Hemserekê Konseya Rayberdişî ya KCK’yî Cemîl Bayiko ke tewrê programê Rojeva Welatî yê Stêrk TV’yî bi, derheqê pêvînayîşê Îmraliyî, xoverdayîşê grevê vêşanîye yo ke qedîya, peyamê Rayberê Şarê Kurdî Abdullah Ocalanî yê derheqê yewîya Sûrîye, weçînitişê Stenbolî, şerê îdlibî û îşxalê Efrînî ercnayîşî kerdî. Bayikî cewabî dayî persanê rojnameger Enes Yildizî yê derheqê sîyasetê Iraq û Başûrê Kurdistanî û krîzê mabênê Îran û Amerîka.

 Hemserekê Konseya Rayberdişî ya KCK’yî Cemîl Bayikî roportajê xo de nê vatî:

“Goreyê eşkerayîyanê ke ameyî dayene grevê vêşanîye qedîyayî. Ez bawer kena ke Leyla Guvene, tepişteyê ke zîndanan de yê û xoverdayoxê ke teber de yê ça benê wa bibê do waştişê Rayber Apoyî bica bîyarê. Ez bawer kena ke nê çalakîyê ke bi mengan o dewam kenê do biqedîyê. Bi na wesîle ez hema çalakgeran silam kena, çalakîya înan a ke resaya amacê xo pîroz kena. Hem mîyanê şarê Kurdî de û hem zî wareyê mîyanneteweyîyî de xeylî nûştox, roşinvîr, sîyasetmedar û pawitoxanê heqanê merdiman paştî daye na çalakî, heta tayênan zereyê xoverdayîşî de ca girewt. Şarê Kurdî, dostanê înan û çalakgeran hemine pîya no xoverdayîş aver berd û resna amacê xo. Her çende çalakî biqedîyo zî şaro Kurd û çalakgerî, dostê Kurdan û şarê Tirkîya do teqîb bikerê tirêm tecrîd qedîyayo yan nê. Eke tecrîd dewam bikero, heqê tepişteyan ê zîndanan bêrê binpaykerdene, no do nêro qebûlkerdene. Her kes do hemverê tecrîdî de mucadeleyî berz bikero. Ma wazenê ke tecrîd reyna nêro kerdene. Ganî Tirkîya qanûnanê xo binpay nêkero. CPT zî mecbûr mende ke şiro Îmrali û zîndananê bînan. Wezaretê Edaletî eşkerayî daye û vat vernîya pêvînayîşê avûkatan de astengîyêk çina. Ganî no qedexe bi hawayêkê fîîlîyî zî bêro qedînayene.

Gama ma eşkerayîya Wezaretê Edaletî, serdananê avûkatan û CPT’yî bigîrê nezerê îtîbarî tîya yew netîceyêk vejêno werte. Tayê hêzanê teberî waşto ke tecrîd biqedîyo. Çew nêeşkeno bi nê halî Tirkîya bipawo, wayîr ci rê vejîyo. Tirkîya ser o zextî ameyî kerdene ke game bierzo. Ganî Tirkîya reyna qanûnanê xo binpay nêkero. Eke çîyêko winayên reyna bibo ne ma, ne şaro Kurd û ne zî hêzê demokrasîyî yê ke hemverê faşîzmî de yê nê halî do qebûl bikerê. Çew nêwazeno ke bi tecrîdî biciwîyo.

Heta Zihnîyet Nêvurîyo Tirkîya de Çi Rey Şer Nêqedêno

Rayber Apoyî û Têgêrayîşê ma xeylî reyan adirbest îlan kerd. Çira? Çunke Rayber Apo wazeno ke Tirkîya de demokrasî aver şiro, problemê sîyasî, ekonomîk û cimatkî yê Tirkîya hal bibê. Eke demokrasî aver nêşiro Tirkîya rê azadî nêna, problemî zî hal nêbenê. Tam eksê nê problemî hîna do bibê giran. Tirkîya de problemê sîyasî, cimatkî û ekonomîkî girêdayeyê şerê Kurdan ê. Eke zihnîyet nêvurîyo Tirkîya de çi rey şer nêqedêno.

Nê pêvînayîşê ke virazîyayî têkilîya înan bi weçînitişî çina. Tayê vanê na hemleyêk a, nê rastî nêyê. HDP partîyêka Tirkîya ya ke demokrasîyî pawena. Tayê kemasîyê ci estê û seba halkerdişê nînan xebate kena. Weçînitişan de zî stratejîyêka demokratîke aver berde û na stratejî netîce girewte. Erdogan nêwazeno Stenbol bikewo destê hêzanê demokratîkan. Reyna wazenê şaredarîyanê Kurdistanî bi dest bifînê. Nika ra xebatanê xo kenê. vernîya tayê şaredarîyan de cîhazî ronayê. Her ca de polis û leşkeri bica kerdê. Ê do nê sîyasetê qeyûmî bidomnê. Ganî bi çalakîyanê cimatkîyan hemverê nê sîyasetî de veng bêro vetene.

Kurdanê Vakurê Sûrîye çi rey hêrişê Tirkîya nêkerd, Tirkîya hemverê înan de şer da destpêkerdene. Tirkîya Efrîn îşxal kerd, wazena ke awanîya ûcayî bivurno. Yanî heto ke hemverê Sûrîye û şarê Kurdî de şer keno Tirkîya ya. Ganî Tirkîya nê sîyasetê xo ca verdo, Efrînî ra vejîyo û îşxalî biqedîno. Ganî gefanê xo yê hemverê rojakewtena Firatî ra fek vera bido. Eke Tirkîya nînan bikero do problemê Sûrîye hîna asan hal bibê. Sûrîyeyêka demokratîke virazîyo.

Nika Iraq û Başûrê Kurdistanî prosesêkê zehmetî ra ravêrenê. Sebebê ci zî ambargoyê Amerîka yê serê Îranî yo. Amerîka wazena ke her kes paştî bido nê ambargoyî û zextê serê Îranî zêde bibê. Tirkîya û Iraq, Iraq û Başûrê Kurdistanî zî seba halkerdişê nê problemî pêvînayîşan kenê. Başûr zî gama ke beno zihîf yan zî tewirêkê biperçeyî ramojneno keweno tesîrê dewletanê teberi. Ganî nê bêrê dîyene. Xusûsen eke Başûr de kongreyêka neteweyîye virazîyo do problemî bieşkê hal bibê.

Çalakîya Grevê Vêşanîye Resaye Amacê Xo

Na çalakîye reyna ramot ke her çî bi xoverdayîşî yeno pawitene, bi xoverdayîşî yeno qezenckerdene. Bê xoverdayîşî çîyêk nêbeno. Ganî her kes nê netîceyî xo rê ci ra vejo. Ganî çew nêvajo tecrîd wedarîya, tehluke nêmend. Eke şima xoverdayîşî ca verdê û bibê sist, şima do bikewê xefletêkê pîlî mîyan, heta çîyê ke fînayayê dest zî do bikewê tehluke. Ganî xoverdayîş û tîfaq bi hawayêkê xurtî dewam bikero. Hemverê faşîzmî de çalakîyanê demokrasîyî aver berê, do bi nê hawayî netîceyê hîna rindî bêrê destfînayene.