Bayik: PKK de şehadetî meqamêkê fermanî yê

Hemserekê Konseya Rayberdişî ya KCKyî Cemîl Bayikî îfade kerd ke PKK de şehadetî meqamêkê fermanî yê û vat: ''PKK partîya şehîdan a, krîter û bawerîya şehîdan do qetî azadîya şarê kurdî bîyarê ca.''

Hemserekê Konseya Rayberdişî ya KCKyî Cemîl Bayikî bi wesîleya serrgêra 44. ya ronayîşê PKKyî ANFyî rê qisey kerd. Beşo diyîn ê qiseykerdişê Bayikî bi kilmî wina yo:

''PKK verî sey Apogîran şinasîyayêne.Fikr, tarz, uslub û metodê PKKyî Rayberîye dîyar kerdî. ma o çax wendekarê zanîngehî bîyî. Ronayîşê Apogîran û PKKyî de, warê beşdarî û pîlbîyayîşê ci de tesîr û morê Rayber Apoyî esto. Kok, gowdeyê PKKyî zixm o. Apogîran têgêrayîşêk na ro coka hende wayîrê tesîrî yê. Rayber Apo mîyanê têgêrayîşî de tim bi wayîrê înîsîyatîf, afernayox û ey hemle daye destpêkerdene. Ma xîret kerd ke ey teqîb bikerê û xeta ci bîyarê ca. Bêguman PKK de ked û hemkarîya her kesî esta la Rayberîye morê xo da binê ci. Na zî raştîyêka tarîxî ya.

PKKyî dinya de û pêro Kurdîstanî de bi mîlyonan kesî rêxistin kerdî, tewrê têkoşînî kerdî. Destpêk de 3-5 apogîrî estbîyî. Kemal Pîrî û Hakî Karerî verî Rayber Apo şinasnayêne. Dima ke Rayber Apo zîndanî ra vejîya keyeyê Hakî û Kemalî de mend. Kemalî vatêne 'roja verêne ra ey tesîrê ma kerd. Mîyanê hewteyêkî de ma fikrê ey qebul kerdî.' Rayber Apo cara destpêk de taybetmendîya xo vete werte. Rayber Apoyî embazîya raştikêne afernaye, raştîya xo ya Rayberîye û kadrobîyayîş vetî werte.

Bê Rayber Apo ne têgêrayîş hende geş bîyêne ne zî heqê hende zehmetîyan ra ameyêne. Zîndan de embazan pê Rayberîye bawer kerd û hende xo ver da. Ruho ke Rayberîye awan kerdo ruhê xoverdayîşî yo. Embazanê zîndanan verî ke şehîd bikewê pare kerd ke Rayber Apoyî qetî rêxistine kom bikero û têkoşîn geşêr bikero. Bawerîya înan a bi Rayber Apoyî zêde bîye.

Darbeya 12ê Êlule ra dima PKKyî kadroyê xo antî Rojhelatê Mîyanênî, Lubnan û kampanê Fîlîstînî. 1980-84 de PKKyî rêxistinîya xo kerde. Darbeya 12ê êlule ra dima têgêrayîşê çepgîrî û têgêrayîşê kurdan vila bibî. Mîyanê PKKyî de zî tay kadroyanê tasfîye waştêne têkoşîn nêro kerdene. Rayberîye embazî kom kerdî û têkoşîn de bi israrî têgêra. Qet yew zehmetîye nêeşkaye verê Rayberîye bigêra. 

Ey pê îmkananê qijan zaf karî kerdî û afernayîşê erjan xo rê kerdî esas. Rayber Apoyî nê serran de tesîr û giranîya xo îsbat kerdî. Rayber Apo 23 serrî yo zîndan de yo la qetî tesîrê ci nêkêmîya, o qels nêbi. Eqsê ci tesîrê ci zêdîya, vila bi. Rayberîye pê derzîne bir kêna, ame a aste ke çew nêeşkeno tesîrê ci werte ra wedarno. Rayber Apo raştîya rayberîye de safhayêka newî ya, lewe yo. 

Rayber Apoyî vat PKK partîya şehîdan a. Yanî her erjo ke mîyanê PKKyî de yeno awankerdene aîdê şehîdan o. Rayber Apoyî vat: 'Ez vervatoxê şehîdan a, ez keda înan nêvisnena binê payan û nêverdena kes keda înan biwero. Nasnameyê têkoşînê înan, ferasetê înan, krîter û perwerîya înan, armancê înan çita yê PKK zî o yo. Naye ra ber ma çîyêk qebul nêkenê.' Pê şehadetê Hakî Karerî nê sozî cayê xo dî û pratîze bi. Partîbîyayîşê PKKyî seba caardişê hesreta şehîdan bi. Rayber Apoyî sey fermanê şehîdan na partîye awan kerde, pîl kerde û viste mîyanê têkoşînî.

Kulturê PKKyî, hişmendîya ci û xeta ci şehadetê Karerî ra dima dest pêkerde.Seba PKK û Rayber Apoyî her şehadet sebebê hemleyêka şorişgêre yo. Merdimê ke bi nê hawayî nêzdîyê şehîdan nêbenê bêhurmetîye kenê. Mîyanê PKKyî de şehadet îdare ra heta kadro û şarî meqamêkê fermanî yo. Her şehîd/e bi bawerîyêka pîle  ver bi şehadetî şî/ye. Çunke înan armancê partîye fam kerdî. Şehîdî wexto ke ver bi şehadetî şinê û wina fikirîyenê, wexto ke kadroyê PKKyî na mana danê şehîdan têkoşîn eşkeno bêro geşkerdene.

Têkoşînê şehîdan krîteranê partîye zêdîneno, krîterê fedayîtîye geş keno. Heta ke krîterê şehîdan bibê partîya ma qetî do ser bikewa. Têkoşînê şarê ma de zî çimeyo tewr pîl şehîdê ma yê. Serewedaritişê pîlî yê 1990an şehadetan ra dima qewimîyayî. Serewedaritişê Amedî yê 2006î esasê wayîrvejîyayîşê şehîdan ser  o qewimîya. Her şehadetî têkoşîn geşêr kerd. Kurdîstan de her keyeyî şehîdî dayî. PKK partîya şehîdan a, krîterê şehîdan û bawerîya înan do qetî azadîya şarê kurdî bîyarê ca.

Destpêk de zî PKK partî û têgêrayîşan ra cîya bi, îdîaya ci pîl bîye. Ma verî komêka qij bîye. Çewî pê na koma qije bawer nêkerdêne ke do pîl biba. Dewlete zî wina nêzdîyê na kome bîye. La ma pê zanayêne ke koma ma do biba pîlêr. îdîa, coş û heyecanê ma estbî. Koma ma hema qij bîye, wayîrê taybetmendîyanê şorişgêran bîye. La ma pê pratîkan cîyatîya xo mojnaye.Rayberîye ma ra zêdê raştîya dişmenî û zehmetîyî zanayêne. Ey zanayêne e Şorişê Rojawanî do şorişanê bînan ê dinya ra do cîya bibo. 

Rayber Apo raybero şorişgêr o ke şertî nêeşkayî ey sînordar bikerê. Ey bawer kerd ke têkoşînê ma do bireso lewe. Wexto ke Anqara de ma 10-15 wendekarî bîyî ey bire daye ke ma hînî xebatanê xo Kurdîstan de bikerê. Ey vatêne wa têkoşînê gerîlayan hînî erey mekewo. Ronayîşê PKKyî, qewimîyayîşanê warê komelkî de bira naye her çi vurna. Xora şehadetê Hakî Karerî reyde, wexto ke xebatê ronayîşê partîye ameyêne kerdene vera tay kes û dezgehanê ajanan o cade têgêra.

Ma pê bawer kerdêne ke ronayîşê PKKyî ra dima tay çîyî biqewimîyê la ma nêzanayêne ke çîyê senînî do biqewimîyê. Hedefê ma pîl bîyî. Rayber Apoyî vatêne kesê ke hedefê înan pîl ê têkoşîn û tempoyê înan zî do pîl bibê. Serkewtişêko pîl o ke ma sozê xo de vindertî, ma da di îdîayan. Ma 50 serran bêmabên têkoşînê xo rê dewam kerd û ard heta tîya. Ma eşkayêne serkewtişanê hîna pîlan bivisnê destî. Îmkan û firsendê ma estbîyî. Ganî ma nê hetî ra xo rexne bikerê. Rixmo ke qelsî û kêmasîyê ma estê PKKyî karê pîlî kerdî. Têkoşînê PKKyî ra nêbîyêne ma nê çîyan ra fek vera bidayêne. Ewro xêrê qewimîyayîşanê têkoşînê PKKyî ra xeylêk têgêrayîşê kurdî estê.''