Hemserekê Konseya Rayberdişî ya PKKyî Cemîl Bayikî bi wesîleya serrgêra ronîyayîşê PKKyî ANFyî rê qisey kerd. Beşo diyîn ê roportajî bi kilmî wina yo:

''Rayber Apoyî tim tewrbîyayîşê cinîyan esas girewte. Ey seke yew netewe yê ewnîyayêne cinîyan. Rayber Apoyî dîbi ke komelî kolebîyayîşê cinîyan ra dima raştîya xo vînî kerda. Hema ke ma Anqara de wendekar bîyî Rayber Apoyî waşt ke cinîyî wa tewrê têgêrayîşî bibê. Rayber Apoyî o çax vat ke heta ke cinîyî azad nêbê komel zî azad nêbeno. Rayber Apoyî bi nê hawayî cinîyî hewnê mergî ra şîyar kerdî. Rayber Apoyî bi xo îdeolojî û teorîya cinîyan awan kerde û dima zî rêxistinî û têkoşînê cinîyan vistî dewre. Ewro pêro dinya de sloganê 'jin, jiyan, azadî' zimîyeno. No zî îsbatê serkewtişê teorîya Rayber Apoyî yo. Xora Rayber Apoyî vatbi ke seserra 21. do biba seserra cinîyan. 

 Rayber Apoyî wexto ke PKK naro verî armanc kerd ke hişmendî û kesayetê komelî bivurno. Coka PKK têgêrayîşanê kurdan ê bînan ra cîya yo. Rayber Apoyî û PKKyî naye ra netîce girewte. PKK vera sîstemê kapîtalîstî vindert, Rayber Apoyî dîrekt vat ke kapîtalîzm dişmenê kurdan û Kurdîstanî yo. Rayber Apo û PKK vera îxanet û hemkarîya dişmenî vindertî û vera nê wird xetan têkoşîn kerd. Têgêrayîşê kurdan ê bînî bîyî vînî şîyî la PKK 50 serrî yo payan ser de yo. Rayber Apoyî Anqara de wextê ronîyayîşê îdeolojîya partîye de zaf têkoşîn kerd. Dima Rayber Apoyî verê xo da Kurdîstanî. Rayber Apoyî verî waşt ke çepê tirkan reyde têbigêro la dima ke dî ke çepê tirkan gamêke nêerzeno ey bi xo verê xo da Kurdîstanî. Çunke armancê ey azadî û demokrasî bîyî. 

O çax çewî bawer nêkerdêne ke PKK verê xo bido Kurdîstanî. PKK û Rayber Apo naye ra ê bînan ra cîya yê. PKK û Rayber Apoyî vat se o qayde kerd. Vate û pratîkê înan yew o. PKK û Rayber Apoyî têna vate yan zî pratîk esas nêgirewt. PKKyî no dîyalektîk asta pîle de vist dewre. Wexto ke kadroyî kewtî Kurdîstanî zî şarî hînî dî ke ma senîn ê. Şarî dî ke PKK sey înan o, peyê menfaetê xo de nîyo. Seke Rayber Apoyî vatbi şarî nêewnîyayêne vateyanê kadroyî ra ewnîyayêne têgêrayîşanê kadroyî ra. Şarî dima tim paştî daye partîye. 

Têgêrayîş Anqara ra dima Kurdîstan de zî şerêko îdeolojîk o xurt kerd. Têgêrayîşê azadîye coka hende bi pîl. Wexto ke Rayber Apoyî bire dabî ke têgêrayîş bero Kurdîstanî ame tehdîtkerdene la ey raya xo ra fek vera nêda. Ma zî o çax bêtecrube bîyî. Şarê kurdî nefesê xo yo peyên dayêne. Ma seba ke şar hewnê mergî ra şîyar bikerê zaf xîret kerd. Dima ma netîce girewte; şarî sere wedarit. Ma bezreyê têgêrayîşî Anqara de dî la ma no bezre Kurdîstan de ramit. Çunke kokê ma Kurdîstan de bîyî.

Wexto ke ma dekewtî Kurdîstanî verê ma de zaf astengîyî bîyî. Hem kesê ke qaşo xo rê vatêne çepgîr û welatperwer înan ma asteng kerdêne hem zî şarî pê têkoşînêkê neweyî bawer nêkerdêne.  Hetê madîyî ra zî qet yew îmkanê ma çin bi. Ma pê şerê îdeolojîkî heqê astengîyan ra ameyî. Dima têgêrayîş bingeyê Kurdîstanî de aver şi û vurîya têgêrayîşêkê polîtîkî. Rayber Apoyî seba awankerdişê yew îdereyî kombîyayîşê Dîkmenî serûber kerd û nê kombîyayîşî de pratîkî ser o nîqaşî ameyî kerdene. MÎT û dewlete qetî nêeşkayî têgêrayîşê ma bigêrê binê kontrolî. Heta ke ê pê têgêrayîşê hesîyayî zî têgêrayîşî rew ra xo rêxistin kerdbi. Dişmenî verî bi xo hêrişê têgêrayîşî nêkerd. Pê eşîr, faşîstan û gruban hêrişê partîye kerd. Embaz Hakî Karer wina ame qetilkerdene. 

Tarîxê ma de verî Anqara de embaz Alî Dogan Yildirim netîceya yew qezayî de, Dêrsim de zî embaz Aydin Gul şehîd bîyî. La şehadetê ma yo pîl ê embaz Hakî Karerî bi. Embazan ê cinîyan ra şehîda ma ya verêne embaze Besê Enuş a. Şehadetê embaz Hakîyî ra dima tay kesî tersayî û şîyî. La embazîye esasanê Rayber Apoyî ra yewe bîye. Coka ey şehadetê embaz Hakîyî kerd wesîleya ronayîşê PKKyî. Her şehadetî PKK kerd pîlêr. Rayber Apoyî şehadetê Hakîyî ra dima bernameyê partîye nuşt, vila kerd. O çax Xarpêt û Amed de nîqaşê pîlî qewimîyayî. O çax Hîlwan de embaz Halîl Çavgun hetê polîsan, faşîstan û eşîra Suleymanî ra ame şehîdkerdene. Dima qesasê embaz Halîlî ame girewtene. Şehadetê embaz Halîlî ra dima Rayber Apoyî reyna apey game nêeşte. Hîlwan de têgêrayîşê ma vera eşîra Suleymanî têkoşînêko pîl kerd. Têgêrayîşê ma destê Suleymanî ra her çi girewte, şaredarîye zî tede. Dima reya verêne cinîyêka kurde dayîke Durê bîye hetkara şaredarî. Ey hetkarîya têgêrayîşî kerde, paştî daye ma. Şarî zî a kerde hetkara şaredarî. Hîlwanî ra dima tesîrê têgêrayîşê ma resa Dêrsim, Riha, Mêrdîn û Êlihî. 

Sêwrege de zî xayînê bi nameyê Celal Bucakî est bi. Nê xayînî plan kerdêne ke hêrişê têgêrayîşî bikero. La têgêrayîşî zî Sêwrege de xo rêxistin kerd. Sêwrege de têgêrayîşî Celal Bucak kerd hedef la o bi birînêke xelisîya. Sêwrege de tay kêmasîyî qewimîyayî. Heyf ke ma Sêwrege de zaf şehîdî dayî la reyna zî ma hêzê Bucakan zaf qels kerd. 

Dewlete Hîlwan û Sêwrege ra dima bire daye ke bikewa dewre. Qirkerdişê Mereşî wina qewimîya. Dewlete bi nê qirkerdişî mesaj da têgêrayîşê ma. La Rayber Apoyî hîna bi lêzî xebatê partîbîyayîşî kerdî.

Kombîyayîşê Amedî de hînî kadroyî bira kongre daye. Rayber Apoyî zî embaz Abbas û Seyfettîn Zogurlu seba amadekarîyanê kongre wezîfedar kerdî.  Ma xîret kerdêne ke çew pê kongre nêhesîyo. Ma kerdêne ke pêro tedbîran bigêrê. Seke zanîyeno kongre dewa Fisî ya qezaya Licê ya Amedî de ameye kerdene. Na dewe dewa embaz Seyfettînî bîye. Ma keyeyê embaz Seyfettînî de ameyî pêser. Na kongreya ma ya verêne bîye û tede PKK ronîya. Na kongre de armanc, krîter û xeta PKKyî ameyî dîyarkerdene. Rayber Apoyî kongre destpêkî ra heta peynî îdare kerde. La têna embaz Hayrî Durmuş dîwan de bi. Rayber Apoyî kongre de partîbîyayîşî, wezîfeyanê yew partî û kadroyan ser o qisey kerd. 

Kongre bi temamî serkewte bîye. Kongre de tay birî ameyî girewtene. Îdareyê partîye ame weçînayene. Sey tedbîrî tay îdarekerî cade kongre de ê bînî zî dima ameyî dîyarkerdene. Rayber Apoyî seba ke tay kesê şikdarî nêkewê îdare wina yew tedbîr girewt. Kongre ra dima weçînayîş ame kerdene, heyetê rayberdişî ame weçînayene û wezîfeyî ameyî vilakerdene.

Hînî ganî ronîyayîşê partî biameyêne îlankerdene. Ame plankerdene ke bi hêrişê vera Celal Bucakî Sêwrege de ronîyayîşê partîye bêro îlankerdene. Embaz Mehmet Karasungur coka nêeşka tewrê kongre bibo, xora embaz Kemal Pîr zî zîndan de bi. Axir kongre bi silametî qedîyaye. Pê çalakîya Sêwrege partîye ameye îlankerdene. 

Îlanê ronîyayîşê partîye mîyanê şar û kadroyî de bi coşî ame pêşwazîkerdene. Têkoşînê têgêrayîşî hînî resabi astêka berze û bawerîya bi têkoşînî zêdîyaye. Şarî îlanê partîye ra dima hîna zaf mîyanê têkoşînî de cagirewt, her kesî dî ke şarê kurdî û Kurdîstan est ê û partîye azadîye de isrardar a. Kongreya Yewîne hem mîyanê kadro û şarî de hem zî warê mîyanneteweyî de tesîrêko pîl viraşt.''