Hemserekê Konseya Rayberdişî ya KCKyî Cemîl Bayik tewrê bernameyê taybetî yê Stêrk TVyî bi û rojdem ercna.

Qiseykerdişê Cemîl Bayikî ra tay noqtayê girîngî wina yê:

''Seba azadîya Rayber Apoyî zaf xîretî û çalakîyî yenê kerdene, seba azadîya ey têkoşînêko fîraz yeno kerdene. Çunke wayîrvejîyayîşê Rayber Apoyî wayîrvejîyayîşê azadî, demokrasî, heqan û erjanê merdimîye yo. Zaf sebebê tecrîdê vera Rayber Apoyî est ê, nînan ra yew no yo ke Rayber Apoyî ra tersenê. Sebebo bîn zî no yo ke Rayber Apo 25 serrî yo zîndan de yo ganî hînî bêro veradayene. La dewleta tirke pê bahaneyanê sey cezaya dîsîplînî verê ney gêna. Dewleta tirke ganî heta êlule cewabêk bida Konseya Ewropa. Dewleta tirke seba ke têkilîya şarê kurdî û Rayberê Şarê Kurdî binî ra bibirna tecrîd hîna giran kerdo la dewleta tirke se kena wa bikera nêeşkena zerrîya şarê ma ra Rayber Apoyî veja. Ewro her kes fikranê ey zaneno, tesdîq keno. Wayîrvejîyayîşê Rayber Apoyî vervejîyayîşê faşîzmê AKP-MHPyî yo. 

Dêrik de û Dîlok de qirkerdişê pîlî ameyî kerdene. Dewlete senî ke DAÎŞî pê wesayîtan hêrişê şarî kerdêne wina hêrişê şarî kena. Wa çew nê qirkerdişan rê mevajo qezayê trafîkî. Dewleta tirke qestî ra şarê kurdî ha qetil kena. Zîndanan de tepişteyanê kurdan qir kena, seke Qileban û Amed de bîyî cinîyan qir kena. Nê qirkerdişê vera cinîyan zî tesadûfî nîyê. Reyna xozaya Kurdîstanî yena talankerdene. Têna PKK nê kurdî û Kurdîstan zî hedefê dewleta tirke yê. Mesuldarê qirkerdişanê Dêrik û Dîlokî AKP-MHP yo. Wa şarê ma serweşîya nînan qebul nêkero, tezîye ra nînan def bikero. Wa şarê ma vera kerdişanê dewlete sere wedarno, nînan qebul nêkero. O çax no îqtîdar nêeşkeno payan ser de vindero.

Dewleta tirke vera gerîlayan çeka kîmyewîye, bombaya nuklere, termobarîk, fosforî yanî destê ci de çi est o şuxilnena. Dewleta tirke rixmê nînan û destekê NATO û Barzanîyî zî pê gerîlayan nêeşkena. 4 mengî yo ê verê gerîlayan de teng bîyê. Dewlete kişteyanê xo eşkera nêkena. Destê gerîlayan de cenazayê leşkeran est ê. Gerîlayê HPG û YJA-Starî hê rûmetê merdimîye pawenê, bi qehremanî xo ver danê.  Wa her kes dormeyê gerîlayan de bêro pêser û çalakîyan pîl bikero. Wa her kes pê ruhê gerîlayan têkoşîn bikero. Embazê ma Zap, Avaşîn û Metîna de beno ke bi rojan bênan û bêawe şer kenê, derbanê pîlan danê dişmenî ro. Gerîlayan xo kerdo newe, bîyê bihêzêr. Dişmen bi xo ney îtîraf keno. Gerîlayî pê qehremanîyanê xo pêro dinya rê benê mîsal. Gerîlayî nika taktîkê tîm û tunelan anê ca. Coka dewleta tirke rixmê teknîkê xo nêeşkena çîyêkî bivisna destî. No şer do peynîya AKP-MHPyî bîyaro. Wa hêzê ke vera faşîzmî têkoşîn kenê, şerê gerîlayan xo rê nimûne bigêrê û erkanê xo bîyarê ca.

Qerargehê ma vera bîlançoya şerî eşkera keno. Şehîdê ma est ê la hende zaf nîyê. Bîlançoyî mojnenê ke gerîlayî hem tay vînîbîyayîşan danê hem zî derbanê giranan danê dişmenî ro. Eke gerîlayî wayîrê îradeyêkê qewetînî, embazîya xurte û hişmendîye nêbîyayêne wina nêeşkayêne têkoşîn bikerê. Gerîlayî bingeyê felsefeya Rayber Apoyî de 4 mengî yo rixmê bêîmkanîye xo ver danê. Ma nêeşkenê nê embazanê xo rê deynê xo bidê. Ganî ma zî layîqê nê xoverdayîşî bibê û pê nê ruh û îradeyê gerîlayan têkoşîn bikerê. Dewleta tirke vera gerîlayan de bin kewta û do bikewa. Ez naye ser o reyna gerîlayan fîraz kena û minetê xo pêşkêşê înan kena.

Kombîyayîşê Madridî yê NATOyî ra dima endamê neweyî ameyî qebulkerdene û waştişê Tirkîya ameyî caardene. Nê waştişî çita yê? Dewleta tirke waştêne NATO şerê vera PKKyî de paştî bido  ci, çekan bido ci. Ez venga NATOyî dana ke wa hemkarê sûcanê dewleta tirke mebo. Kombîyayîşê Tehranî de zî dewleta tirke Rûsya û Îranî ra reyna tasfîyeya PKKyî û qirkerdişê kurdan waşt. La nê nêameyî qebulkerdene. La Tirkîya ra ame waştene ke rejîmê Şamî de pêbikera. Kombîyayîşê Soçî yê Putin û Erdoganî de rayîrê hêrişanê dewleta tirke yê vera Rojawanî ame akerdene. Rûsya û Amerîka mesuldarê qirkerdişanê dewleta tirke yê. Şarê Rojawanî vano ê do têkoşîn bikero ûb erdê xo war meverdo. Çîyo raşt zî no yo. Şarê Rojawanî vera DAÎŞî şer kerd, bedelê pîlî dayî. Ganî Amerîka û Rûsya paştî nêdê Tirkîya. Wa şarê Rojawanî bedelê ci çi beno wa bibo erdê xo meterikno. Eke biterikno do bin bikewo. Şarê ma kam ci rê dişmenîye keno wa vera ey têkoşîn bikero. Çîyo raşt no yo.''