Hemserekê Konseya Rayberdişî ya KCKyî Cemîl Bayikî serra 2019î û ameyoxê kurdan û Kurdîstanî Bernameyê Tabetî yê Stêrk TVyî de ercnayî.

Ercnayîşê Cemîl Bayikî wina yê:

''Vanê ke DAÎŞ qedîya, no raşt nîyo. DAÎŞ hetê sîyasî, leşkerî û komelkî ra dewam keno û do dewam bikero. Modernîteya kapîtalîste DAÎŞ awan kerd. Tirkîya dekewte Rojawan û îşxal kerd. Wazena ke Rojawan de ca bida cerganê xo û îşxalê xo hîra bika. Seba ke cergî qîm nêkerd a bi xo dekewte ci. Cayo ke Tirkîya tede ya uca de kaos, şer estê, aramîye çin a. Çunke Tirkîya vera demokrasî û kurdan a. Tirkîya seba ke kurdî wayîrê statuyêke nêbê Rojawan îşxal kerd. Çunke eke kurdî Rojawan de wayîrê statûyêk bibê uca de demokrasî awan kenê. No zî tesîrê Tirkîya do bikero. O wext AKP û MHP hînî nêeşkenê bibê îqtîdar. Seba ke îqtîdarê xo dewam bikê, kurdan çin bikê asteng kenê ke kurdî Rojawan de wayîrê statuyêke nêbê.

Kurdî hînî Rojhelatê Mîyanênî de hêzêko bingeyî yê. Êyê ke hetê kurdan nêgenê nêeşkenê Rojhelatê Mîyanênî de babetêke ser o netîceyêk bigêrê. Înan vatêne qey kurdê Serêkanîyê û Girê Sipî do teslîm bibê. La xoverdayîşêko pîl ame kerdene. Vera nê xovedayîşî pêro planê Tirkîya bîyî pûç. Nê xoverdayîşî kerd ke hem Tirkîya qels biba hem zî raştîya Rojawanî bivejîya meydan.

No xoverdayîşê Rojawanî bi xoverdayîşê şaranê dinya. Bi nê xoverdayîşî yewîya kurdan zî bîye zixm. No seba ma destkewteyêko tewr pîlêr o. Tarîx de kurdî verê awil ameyî wayîrvejîyayene û paştdayene. Xoverdayîşê şarê kurdî bi hêvîya her kesî. Pêro şarê dinya wayîrê nê xoverdayîşî û şorişî bîye.Dewleta tirke wazena ke seba ke kurdan çin bika reya verêne Rayberê înan çin bika. Naye ra tecrîdê vera Rayber Apo rayra bena. La şarê kurdî bi xoverdayîşê xo wayîrê Rayber Apoyî vejîya. Bi nê hawayî wayîrê xo zî vejîya. Şarê ma na polîtîka qebul nêkerde û vera naye vindert.

Leyla Guven û xoverdayoxanê zîndanan xoverdayîşêko pîl û tarîxî kerd. Nê xoverdayîşî de keda mayanê laçiksipîyan zî pîl a. Nê xoverdayîşî de tay şehadetî zî bîyî. Ez  nê şehîdan bi rêzadrî yad kena û sozê ma dibare kena. Nê xoverdayîşî weçînayîşê Tirkîya ser o zî tesîr kerd. Eke AKPyî weçînayîşan de derbeyêka pîle werde naye bi sayê xoverdayîşê zîndanan o.Rayber Apoyî o çax bi berpirsîyarîye nêzdîyê Tirkîya bi. Tay çarserîyî pêşkêşê Tirkîya kerdî. Bi nê hawayî mesela kurdî newe ra viste rojdem. Rayber Apoyî mojna ke şarê kurdî û Tirkîya bêelternatîf nîyê. Bernameyo ke Rayber Apoyî pêşkêş kerd seba şaranê Tirkîya, hêzanê demokrasîyî û merdimîye yo.

Hînî nêeşkenê ke terîdê Rayber Apoyî derg bikê. Tecrîd exlaqî, wijdanî û biedaletî nîyo. Reya verêne vat ma tecrîd wedarit dima tecrîdê Rayber Apoyî hîna xorîn kerd. Seba bernameyê çareserîye yê Rayber Apoyî cewabê înan 'ney' bi. Dima înan HDP sucdar kerd, şaredarîyê HDPyî xesp kerdî. Dewleta tirke nêwazena ke haştîye û demokrasî aver şêrê. Wazena zere û teber de şer bibo pîl.Vera hêrişê dewleta tirke ya qirkere Rayber apo, şarê kurdî û gerîlayî xo ver danê. Seba nê xoverdayîşî zaf bedelî yenê dayene. No xoverdayîş têna seba Kurdîstanî ney seba pêro merdimîye yo.

Tay vanê seba ke PKK Başûrê Kurdîstanî de yo coka dewleta tirke hêrişê ci kena. No raşt nîyo. PKK çinêbo zî dewleta tirke bi bahaneyêke hêrişê ci kena. Wextê referandumî de zî dewleta tirke Başûrê Kurdîstanî tehdît kerd. Çunke dewleta tirke vera destkewteyanê pêro kurdan a. Dewleta tirke dişmena pêro şaran a. Eke nêeşkena pêro kurdan qir bika paştê PKKyî ra yo. Çunke PKK bi xoverdayîşê xo, têkoşînê xo vera dewleta tirke yo. Sîyasetê dewleta tirke şero ke zere û teber de kena ser o yo. Eke şer nêbo dewleta tirke nêeşkena payan ser o vindera. Semedê nê şerî  Tirkîya de krîzêkê ekonomîyî yo pîl esto. No sîyaset do dewleta tirke çin biko. Şar vêşan o mird o seba nînan girîng nîyo. Ê têna îqtîdarê xo fikirîyenê. Têna wazenê ke îqtîdarê înan dewam biko, şar xemê înan nîyo.‘‘