Hemserekê Partîya Herêmanê Demokratîkan (DBP) Keskîn Bayindirî derheqê tecrîdê vera Rayberê Şarê Kurdî abdullah Ocalanî de ANFyî rê qisey kerd.

Bayindirî ard ziwan ke Tirkîya û Kurdîstan de kombîyayîşan şarî de çareserîya meseleya kurdan û azadîya Abdullah Ocalanî ameyê waştene û şarî vato ke Rayberê Şarê Kurdî pozîsyonêkê dîyarkerdeyî de yo.

Bayindirî îfade kerd ke seba beşdarîya 'Rayraşîyayîşê Azadîye' ya xurte înan 122 cayan de kombîyayîşî kerdê û vat: ''No rayraşîyayîş seba şiknayîşê tecrîdê vera Ocalanî û caardişê azadîya ey zaf ercîyaye yo. No teyna meseleya kurdan nîyo, her kesî eleqedar keno. Sîstemê Îmraliyî raştîya huqûq, demokrasî û heqanê merdiman a Tirkîya eşkera keno. Çimeyê şerê mabênê dezgehanê dewlete, çimeyê pêkewtişê Mehkemeya Qanûnê Bingeyînî û Mehkemeya Berze ya Temyîzî Îmrali yo. Tirkîya de êyê ke huqûq, demokrasî û heqan wazenê ganî sey gama destpêke seba wedaritişê sîstemê Îmraliyî û caardişê azadîya Ocalanî têkoşîn bikerê.''

Bayindirî bale ante asta krîtîke û tarîxî ya meseleya kurdan ser û vat: ''Raştîya dewlete û îqtîdarî hem Kurdîstan de hem zî Tirkîya de vera komelê azadîgîrî şer îlan kerdo. Rejîm bi vilakerdişê teda, şîdet, qirkerdiş û şerî xîret keno ke xo awan bikero. Naye ra sîstemê Îmraliyî de yeno israrkerdene. Abdullah Ocalan hêzê çareserîye yo stratejîk o. Seba şaran lîdero stratejîk o.''

Hemserekê DBPyî Bayindirî ard ziwan ke sere de şarê kurdî pêro şarê bindestî xîret kenê ke bi têkoşînî peynîya tecrîd û ablûqa bîyarê. Bayindirî vat: ''Coka rayraşîyayîşo ke ma do ver bi Gemlîkî bikerê teyna ê kurdan nîyo. No rayraşîyayîş ê azadîya şaranê bindestan o ke mexdûrê kerdişanê îqtîdarî yê. Ma nê rayraşîyayîşî sey destpêkî vînenê û venga her kesî danê ke tewrê ci bibo.''