Hemserekê Partîya Herêman ê Demokratîkan (DBP) Keskîn Bayindirî derheqê tecrîdê vera Rayberê Şarê Kurdî Abdullah Ocalanî, vurnayîşê qanûnê înfazî, hêrişanê vera Başûr û Rojawanê Kurdîstanî û têkoşînê vera pandemîya vîrusê Korona de ANFyî reyde qisey kerd.

Bayindirî vist vîrî ke 10-11ê adare de wexto ke nêweşo verên ê Korona ame eşkerakerdene ra nata pê beşdarîta partîyan ê sîyasîyan û rêxistinanê komelê sivîlî yê Kurdîstanî înan merkezê koordînasyonê krîzî awan kerdî.

Bayindirî vat: ''Ma xebata koordînasyonê krîzî dewam kenê. Kampanyaya 'Keyeyê Wayûbirayî ya HDPyî zî veng vet. Hetê bînî ra vera şîdetê zereyê keyeyî yê wextê karantîna şaredarîyê ma û dezgehê ma yê cinîyan xebitîyenê. Pê qanûnê înfazî dizdî, tecawuzkerî, talankerî vera dîyayî la tepişteyê sîyasîyî vera nêdîyayî. Nê qanûn meşrûtîyetê polîtîk, exlaqî û sîyasî yê AKP-MHPyî komel de çin kerdî. Têkoşînê vera nê qanûnî nika ra pey zî do dewam bikero. Tecrîdê Birêz Ocalanî nê prosesê janî de zî dewam keno, na rewşe zî ma zaf qerqilnena. Pozîsyono sîyasî yê Birêz Ocalanî seba ameyoxê ma pêroyînan zaf girîng o. Vengdayîşê ma yo tewr pîlêr seba hêz û derûdoran o.

Rejîmê AKP-MHP 10 serrî yo ke bi hawayêkê nîzamî hêrişê kurdan keno. Dewleta tirke xîret kena ke destkewteyanê kurdan çin bikera. Coka hêzanê leşkerî, sîyasî û îstîxbaratî Başûrê Kurdîstanî ca kena. Rêxistinê Başûrî na raştîye nêvînenê. Hêrişê vera Mexmûrî zî parçeyêkê na polîtîka yo. Tewirê sîyasetê Başûrî yo ke nika yeno kerdene, nêeşkeno kurdan cayêk de bîyaro pêser, aver bero û destkewteyanê kurdan bipawo. Ganî cade nê sîyasetî ra fek bêro vera dayene û esasê yewîya neteweyîye ser o sîyaset bêro kerdene.

Neteweyanê Yewbîyayeyan nê wextê pandemîye de seba adirbirnayîşê golbalî veng dabi. Rêxistinanê pêro dinya no vengdayîş qebul kerd û sey ci têgêrayî la dewleta tirke goreyê ci tênêgêraye û polîtîkaya xo ya înkar û çinkerdişî dewam kerde.QSDyî operasyonê xo yê leşkerî vindarnayî. AKP-MHPyî no sey firsend dî û çimeyê awe birna. Sebebê nê pêro hêrişan no yo; dewleta tirke wazena binkewtişê Îdlîbî pê hêrişanê vera destkewteyanê Rojawanî telafî bikera. Wazena hêzanê îtîfaqê xo newe ra kom bikera. Bêguman nêeşkena ser bikewa. Pê metodanê bêexlaqan û hêrişanê leşkerîyan bi hawayêkê demkî tay cayan îşxal kena labelê sena wextêkê dergî do nêeşka nê cayan de bimana. Zengînîya komelkî, ekonomîk, sîyasî û bawerî ya Rojawanî do rayîr nêda ney.''