Bernameyê Roşanê Ziwanê Kurdkî yê Amedî eşkera bi

Roşanê Ziwanê Kurdkî do bi şayîyanê cîya-cîyayan bêro fîrazkerdene. Partî û rêxistinan bernameyê roşanî eşkera kerd û reyna waşt ke wa kurdkî biba ziwanêko fermî û ziwanê perwerdeyî.

Torra Ziwan û Kulturê Kurdan bi wesîleya 15ê Gulane Roşanê Ziwanê Kurdkî Baroyê Amedî de Salona Konferansî ya Tahîr Elçîyî de eşkerayîyêke daye. Platformê Ziwanê Kurdkî, Partîya Herêmanê Demokratîkan (DBP), HDP, Partîya Komunîste ya Kurdîstanî (KKP), PDK-Vakur, Partîya Azadîye, Partîya Azadîye û Merdiman (PÎA), Partîya Azadîya Kurdîstanî (PAK), Komeleya Cigêrayîşê Kultur û Ziwanê Mezopotamya (MED-DER), Enstîtuyê Ziwanê Kurdkî, Komeleya Nuştoxan a Kurdan ûsn xeylêk rêxistin û partîyî zî tewrê eşkerayîye bîyî. 

 Salone de pankarta 'Ziwanê kurdkî wa bibo ziwano fermî û ziwanê perwerdeyî' ameye akerdene. Eşkerayîye hetê Vervatoxê Platformê Ziwanê Kurdkî Şerefxan Cizîrî ra ameye wendene.  Cizîrîyî qala girîngîya Kovara Hawarî û Mîr Celadet Elî Bedîrxanî kerde û vist vîrî ke 15ê gulana 2007î ra nata roja ronîyayîşê Hawarî sey Roşanê Ziwanê Kurdkî yena fîrazkerdene. 

Cizîrîyî dima bale ante polîtîkayanê asîmîlasyon, teda û zorbazîye yê vera ziwanê kurdkî ser û vat: ''Seba welatêkê demokratîk û aramî ganî ziwanê kurdkî azad bibo, verê ci ra pêro astengîyî bêrê wedaritene û kurdkî biba ziwano fermî û ziwanê perwerdeyî. Ma venga her kesî danê ke wa tewrê bernameyanê 15ê Gulane bibo. Ma her ca de bi kurdkî qisey bikerê, biwanê û kurdkî biciwîyê.''

Dima Hemsereka MED-DERî Şîlane Elmas Kan bername eşkera kerd. Bername wina yo: 

*9ê gulane: Serkêşîya Platformê Ziwanê Kurdkî û Torra Ziwan û Kulturî de Meydanê Amedî de kursîyê ziwanê kurdkî do bêro kerdene. (16:30 -19:00)

*10ê gulane: Taxa Seyrantepe ya Bismilî de seba domanan kargeh do bêro akerdene. (15.00)

*11ê gulane: Taxa Seyrantepe ya Parka Musa Anterî de Kargehê Kirmanckî do bêro kerdene. (16.30) / Parka Newroze de fîlmê ''Ciranê Min Totoro'' do bêro mojnayene. (19.00)  

*12ê gulane: Tîyatroyê Şaristanî yê Amedî de kayê Hinek Henekî do bêro mojnayene. (20.00) 

* 13ê gulane: Edlîyeya Amedî de eşkerayîya çapemenîye do bêra dayene. (12.30) 

* Parka Rojava de Dîwanê Dengbêjan do bêro ronayene. (20.00) 

* 14ê gulane: Derheqê kincanê ke Newroze de ameybî qedexekerdene de verê Tîyatroyê Şaristanî yê Amedî de eşkerayîyêke do bêra dayene. (14.00) 

*15ê gulane: Baroyê Amedî de panelê Ziwan û Huqûqî do bêro kerdene. (12.00-15.00)

Bayramoglu de rayraşîyayîş (16.00) 

Zarok MA de dîwanê domanan (18.00)  

*16ê gulane: Salona Veyve ya Demîrokî de şayîye (19.30-23.00)