Hemsereka Konseya Rayberdişî ya KCKyî Besê Hozat Medya Haber TVyî rê qisey kerd. Beşê diyînî yê roportajî de Hozate xîretê xonêzdîkerdişî yê AKP-MHPyî yê ver bi elewîyan û rewşa Sûrîye, Rojawan, Iraq û Îranî ercnaye.

Qiseykerdişê Hozate ra tay noqtayê girîngî wina yê:

''Îqtîdarê AKP-MHPyî bi nê polîtîkayanê xonêzdîkerdişî yê verbi elewîyan armanc keno ke elewîyan teslîm bigêro, bivisno binê xizmetê dewlete, asîmîle û qir bikero. Elewîyî bi serran o teberê dewlete de vindertî. Nika ma vînenê ke tay kesê duşkinî dewlete reyde têgêrenê û komelê elewîyan bivisnê binê kontrolê dewlete. Dewlete wazena elewîyanê xayînan-hemkaran biaferna. Elewîyê ke kewenê binê kontrolê dewlete duşkin ê.

Îqtîdar cemxaneyî Wezîrîya Kulturî rê girê dayê. Yanî ê elewîtîye sey yew bawerîye qebul nêkenê. Kesê ke pê nê polîtîkayanê dewlete û îqtîdar xapîyenê est ê. Tay kesan rew ra muracatê Wezîrîya Kulturî kerdo. Nê kesî duşkin, xayîn û hemkar ê. Ganî nê kesî bêrê teşhîrkerdene û komelî ra bêrê teberkerdene. Nê polîtîkayî pêro polîtîkayê şerê taybetî yê. No îqtîdar dişmenê elewîyan o, Erdogan Muavîye yo, Yezîd o. AKP îqtîdarê emewîyan o. A raşte yew eleqeyê înan pê Îslamîyetî zî çin o. Ganî misilmanî zî vera nînan têkoşîn bikerê.

Dewleta tirke çarçewa şerê taybetî de Silopî, Cizîre û Sûr de festîvalan kena. Nê cayan de xoverdayîş bibi, gonîya ciwananê ma rijîyaye. Pê nê festîvalan dewlete kena ke şarê ma serê gonîye de şayîye bikero. No projeyê pûçkerdiş, bêvîrverdayîşê komelî yo. Ganî şarê ma vera nê festîvalan biweriştêne we. Nê çîyî ganî nêameyêne qebulkerdene. Kesê ke şinê nê festîvalan bêrûmet ê, duşkin û rezil ê. Şarê ma wa nê kesan teşhîr bikero

Îran û Rojhelatê Kurdîstanî de cinîyî mengêke ra zafêr o xo ver danê. Ma vînenê ke nê serewedaritişî de cinî, ciwan, doman, kokim û camêrdî pîya dormeyê sloganê 'jin, jiyan, azadî' de ameyê pêser. No slogano ke hetê Rayberîye ra amebi afernayene, ewro têna manaya sloganî nê manaya paradîgmaya azadîye kirişeno. Yanî yew felsefe ya. No slogan vano ke eke cinîyî azad bibê cuye do azad biba. Ganî dewleta Îranî goş bida nê serewedaritişê cinîyan. Îran û Rojhelatê Kurdîstanî de cinî û şarî azadî, demokrasî û huqûq wazenê. Ganî dewleta Îranî goreyê ney xo bivurna û çareserîyan pêşkêş bikera.

Iraq de kaos destpêkî ra nata est o. Ma wina pawenê ke Birêz Latîf Reşîd sey serekkomarî krîzî çareser bikero, meseleyanê mabênê Iraq-Başûrî bi demokrasî çareser bikero û Iraq demokratîk bikero. Bi îxtîmalê pîlî serekîya Sûdanî reyde hukmat do bêro awankerdene la no hukmat zî zaf daymîş nêbo. Çunke Iraqî rê mudaxeleyê teberî yê sey Amerîka, Tirkîya ûsn zaf ê. Sadr zî do tedaya nê hukmatî bikero. Iraq de çareserîye pê sîstemê xoserîya demokratîke bena.

Rejîmê dewleta tirke pêvînayîşanê bi Îran û Rûsya ra dima xo nêzdîyê rejîmê Şamî kerd. 11 serrî yo mabênê rejîmê Şam û Anqara de kaos est bi. Dewleta tirke seba ke Îdareyê Xoserî çin bikera xo nêzdîyê rejîmî kerd. Erdogan wazeno Rojawan de cergan ra dewletêke awan bikero û dima zî Başûr û Rojawanê Kurdîstanî tewrê sînoranê xo bikero yanî îşxal bikero. El Nûsra (Heyet El Tehrîr) bêdestûrê Amerîka û Rûsya nêeşkeno debikewo Efrînî. Bêguman no planê Tirkîya bi la hêzanê sey Rûsya û Amerîka zî paştî daye nê planî. Tabî no plan weşê cerganê bînan nêşi. Nê cergê ke Tirkîya weye kena, do biba belaya sereyê ci. Dewleta tirke bi El Nûsra dana nê cergan ro. Dewleta tirke Efrînî ra dima nê cergan do Serêkanîyê de zî cabikera. El Nûsra sey DAÎŞ û El Qaîde yo, terorîst o. Xora dewleta tirke soz dabi El Nûsra ke cayanê îşxalkerdeyan bida ci.

Dewleta tirke do pê El Nûsra gefê Şamî bikera ke Şam bido kurdan ro. Dewleta tirke dima do bikera ke nê cergî bikewê pê û yewbînan safî bikerê. Dewleta tirke nê planan çarçewa qirkerdişê kurdan û tasfîyeya Îdareyê Xoserî de kena. Ganî şarê ma hayîdar bibo. Îdareyo Xoser ganî sîyaset, dîplomasî û têkoşînêkê bitesîrî bikero. Şarê Rojawanî bi temamî wa seba şerê şorişgêrî xo amade bikero. Eke Rojawan de Şerê Şarî yo Şorişgêr bêro kerdene serkewtiş do bêro destvistene.''