Hemsereka Konseya Rayberdişî ya KCKyî Besê Xozat Medya Haber TVyî de Bernameyê Taybetî de rojdem ercna.

Qiseykerdişê Besê Xozat ra tayê noqtayê girîngî wina yê:

''Netîceya têkoşînêkê pîlî de Rayber Apoyî Omer Ocalanî de pêvînayîş kerd. Hemleya Azadîye pêro dinya de tesîrêko pîl viraşt û xoverdayîşo komelkî pîlêr kerd. Na hemle zor da dewleta tirke. Hetê bînî ra dewleta tirke polîtîkayanê teber û zereyî de teng bîya. Bi nê hawayî Rayber Apoyî de pêvînayîş ame kerdene.

Xora tecrîd nêqedîyayo, dewam keno. Îmrali de çi biqewimo normal nîyo. Eke Îmrali de çîyêk bêro sereyê Rayber Apoyî dewleta tirke ra parçeyêk zî do nêmano. Rayber Apo garantîya ameyox û yewîya şaran o û demokratîkbîyayîşî yo. Coka gefê vera weşî û asayîya Rayber Apoyî do peynîya dewleta tirke bîyaro.

Têkoşîn û xoverdayîşê şarê ma û tegêrayîşê ma zemînê nê pêvînayîşî amade kerd. Hetê bînî ra hêrişê dewleta tirke bê mabênî dewam kenê. Rayber Apoyî pêvînayîşê xo de vato ke o eşkeno zemînê şîdetî bivurno zemînê sîyaset û huqûqî û çareserîya meseleya kurdan de rolê xo bîyaro ca.

Muxatabê meseleya kurdan Rayber Apo yo. Rayber Apo seba şarê ma, têgêrayîşê ma muzakeregero verên o. O îradeyê şarê ma temsîlm keno. dewleta tirke meseleya kurdan ancax bi Rayber Apoyî eşkena çareser bikera. Rayber Apo seba muzakereyan amade yo. Ma zî sey têgêrayîşî peyê îradeyê Rayber Apoyî de yê. 

Çareserîya ke Rayber Apo do bikero, seba ma do esas biba. Ma do talîmat û perspektîfanê Rayber Apoyî bîyarê ca. La mesele dewleta tirke ya. Dewleta tirke raşta zî çareserîya na mesele nêwazena. Derdê dewleta tirke ameyoxê ci yo. Coka dewleta tirke kena ke îradeyê şarê kurdî teslîm bigêra.

Ganî şarê ma bizano ke îqtîdarê AKP-MHPyî peyê kayan de yo û keno ke îradeyê şarê ma bêtesîr bikero. Wa Hemleya Azadîye de qelsîye nêba; eqsê ci wa bi xurtêrî dewam bikera.

16ê teşrîna peyêne de Koln de rayraşîyayîşêko pîl est o. Heta a roje şarê ma wa bi seferberî têbigêro. Şarê ma prosesêkê tarîxîyî ra derbaz beno. Wa her kes bi xurtî tewrê rayraşîyayîşê Kolnî bibo. La teyna bi nê rayraşîyayîşî ney her ca de serkêşîya cinî û ciwanan de şarê ma xoverdayîşî rê wa dewam bikero. Heta ka Rayber Apo azad bibo wa xoverdayîş û têkoşîn dewam bikero. Eke Rayber Apo azad bibo meseleya kurdan do çareser biba. 

Werte de yew prosesê çareserîye çin o. Îqtîdarê AKP-MHPyî wazeno kurdan qir bikero. Oyo ke nika qewimîyeno şero taybet o. Rojhelatê Mîyanênî de xerîtayî hê vurîyenê. Dewleta tirke zî herême de bi polîtîkayanê îşxalî têgêrena. La Îsraîl plananê xo de Tirkîya teber kena. Coka dewleta tirke qerqilîyena. Dewleta tirke naye ra kena ke kurdan bixapîna. La çalakîya TUSAŞî maskeya ci eşta war. 

Çalakîya TUSAŞî ra dima dewleta tirke cade hêrişê Rojawan û Herêmanê Pawitişî yê Medya kerd. Bi nê hawayî qiseyê 'prosesê çareserîye' zî zûr bîyê. Cora ma roja verêne ra nata vanê ke qiseyê dewleta tirke kayê şerê taybetî yê. Dewleta tirke kena ke polîtîkayanê qirkerdişê kurdan bîyara ca.

Heta ke no îqtîdar polîtîkayanê înkar, îmha, qirkerdişî û qeyûman ra fek vera nêdo çareserîye do nêra. Seke ma vatbi Esenyurtî ra dima Mêrdîn, Êlih û Xalfetî rê zî qeyûmî ameyî tayînkerdene. Îqtîdar do Şaredarîya Îstanbulî rê zî qeyûmî tayîn bikero. 

A raşte muxalefetî wexto ke kurdan rê zulm ameyêne kerdene çimê xo qefilnayî. O zulm ewro resayo înan. Eke ti verê neheqîyêke de bêveng bimanî a neheqîye do biresa to. Beno ke siba ney bîr Serekê CHPyî do bitepişîyo.

Mîyanê CHPyî de hema zî nakokîyî est ê. Nînan ra tayê vanê ke ê do Rayber Apoyî muxatab nêkerê. La Rayber Apo îradeyê şarê kurdî yo û bê ey çareserîye nêbeno. Dişmenîya vera Rayber Apoyî dişmenîya vera kurdan a.

CHP vano meseleya kurdan est a. AKP û MHP vanê meseleya kurdan ney meseleya terorî est a. Îqtîdarî pêro kurdan sey terorîstan îlan kerdê. CHP vano ke ê do meseleya kurdan çareser bikero. La hinî qiseyî bes nêkenê. Ganî CHP seba çareserîya meseleya kurdan bernameyêkî awan bikero. 

CHP vera destsernayîşê Esenyurtî de zî pasîf mend. CHP xo xapîneno. No îqtîdar do her cayî rê qeyûman tayîn bikero. Ganî CHP xoverdayîşêkê xurtî bikero. 

Dewleta tirke Kurdîstan de huqûqê kolonyalîzmî ana ca. Îradeyê şarê kurdî nêşinasîyeno. Vera ney ganî şarê ma bi hawayêkê topyekûnî xo ver bido. 

Çalakîya TUSAŞî çalakîyêka pîle bîye. Na çalakîye asta têkoşînê gerîlayan eşkera kerde. Ez şehîdanê na çalakîya fedayîye embazanê ma Asya Alî û Rojger Hêlînî bi rêz û minetî yad kena. Netîceyê na çalakîye pîl ê ke wextê verê ma de do xo bimojnê ra. Na çalakîye cewabê hêrişanê dewleta tirke da. Embazanê ma serrêke ra nata planê nê çalakîyan kerdêne. Nê embazanê ma ver bi azadîye game eşte. 

Gerîlayî bi heman ruhî Herêmanê Pawitişî yê Medya û Vakurê Kurdîstanî de têkoşîn kenê. Dewleta tirke ancî destveng menda. Heta ke nê hêrişê îşxalî û tecrîdê Îmraliyî nêqedê hema zaf Asya Alî û Rojgerî vejîyê werte. 

Eşkera yo dewleta tirke do şerî rê dewam bikera. Dewleta tirke çend hêriş bikera zî şarê ma û têgêrayîşê ma xo ver danê. Şarê ma do têkoşînê xo rê apey game nêerzo. No şer do bibo peynîya dewleta tirke. Meseleya kurdan çareserîye hinî ferz kena. 

Herême de cara şerî est ê. Dewleta tirke rayîrê xeletî ra şina. Eşkera yo ke dewleta tirke do hêrişanê vera Rojawanî giranêr bikera. Ganî şarê Rojawanî mîyanê seferberîye de bibo û erdê xo bipawo. Ganî bingeyê Şerê Şarî yê Şorişgêrî de şarê Rojawanî têbigêro.''