Qezaya Kendakola ya Xakurkê de 19 serrî cuwa ver ewro 11 domanî û 13 cînîyî zî tede 42 sivîlî bi bombardûmanê tîyareyanê şerî yê Tirkî ameyî qetilkerdene.  Qetilkaran hesab nêda û ewro şarê Kendakola qirkerdişêkê neweyî rê rî bi rî yo.

Teyareyanê şerî 15’ê Tebax a 2000’î  de herêma Bradostî ya ke mabênê Başûr, Vakur û Rojakewtene de ya vera wareyê Kendakola ya pabesteya Xakurkê de bi bombayanê kazanî hêriş kerd. Bombardûmanan de eşîrê Bradost û Herkî ra 11 domanî û 13 cînîyî zî tede 42 sivîlî ameyî qetilkerdene.  Îdarekaranê demî yê Tirkî vat qirkerdiş xeletî ra bîyo waşt ke binimnê. Hukmatanê Kurdistanê Federalî û Iraqî zî bêveng mendî û bêvengîya înan 19 serrî yo dewam kena. Rixmo ke qirkerdiş keweno sera 20’ine hema derheqê ci de  ne dawayêk ne cipersayîşêk nêamo akerdene. Bêvengîya qirkerdişê Kendakola qirkerdişanê Kortek û Roboskî rê bi zemîn û vernîya qirkerdişanê neweyan ê dewleta Tirkî akerde.

Bradostijê ke raştê qirkerdişê Kendekola ameyî dimayê 19 serran ewro reyna bi polîtîkaya îşxalî û qirkerdişanê neweyan rî bi rî yê. Hêrişê îşxalî yê artêşa Tirkî yo ke 26’ê Gulane de Bradost de ame destpêkerdene dewam keno. Her roje koyî, wareyî û cayê roniştî yenê bombardûmankerdene. Şopê qirkerdişê Kendakola hema esenê. Çalê girdê ke bi bombayanê kazanan ameyî akerdene, darê ke ameyî letekerdene, pêkayok û lastîkê domanan wina cayê xo de vindene.

Wa Hukmatê Başûr û Iraqî  Îşxalkaran rê Hetkarî Nêkero

Kesê ke merdimê xo nê qirkerdişî de vînî kerdî û şahîdê qirkerdişî yê bidej û bihêrs ê. Şahîdanê qirkerdişî ra Weysî Reşoyî ard ziwan ke keyeyê înan ewro reyna yenê bombardûmankerdene û va: ’’ Rîskê qirkerdişêkê bînî esto. Ma emserr binê tehdîtê girdî de yê. Hêzê Tirkî ame herre û wareyê ma îşxal kerdî. Ma nêeşkeê mîyanê bêro çerênayene. Bi teyareyan û topan herra ma yena bombardûmankerdene. Ganî dewleta Tirkî cade erdê ma ra vejîyo. Ez veng dana hukmatanê Başûr û Iraqî wa hetkarîya xo ya îşxalî biqedîne. Problem PKK nêyo, wazenê ke Kurdistan îşxal bikerê. Senî ke Kendakola  de 42 kesî qetil kerdî wazenê reyna ma qetil bikerê.  Wazenê ma herra ma ra vejî, la ê se kenê wa bikerê ma herra xo canêverdenê.’’

Ma Rixmê Heme Hêrişan Herra Xo ra Nêvejîyenê

Kurdoyo ke qirkerdişê Kendakola de xeylî merdimî xo vînî kerdî vist vîrî ke ewro heman tehluke dewam keno û va: ’’Ez bêvengîya îdareyê Başûrê Kurdistanî fam nêkena. Krîzo gird esto. Ma nêeşkenê vejîyê wareyan. Heywanê ma hêrişê dewleta Tirkî de telef benê. Wazenê ke ma herra xo ra vejîyê. Dewleta Tirkî ameya koyê ma îşxal kerdê. Ganî hêzê Tirkî herra ma ra vejîyê. Waştişê dewleta Tirkî Koyê Şekîf û çend koyî nê îşxalkerdişê heme Kurdistan o.’’

Seba ke Hesab Nêame Persayene Ewro Qirkerdişê Neweyî Benê

Kumrî Xelefa  ke qirkerdişê Kendakola de lajê xo pîya bi cinî û di domananê ci vînî kerdî bale ante bêvêngîya hukmatê Başûrî ya vera qirkerdişê Kendakola û va: ’’Seba ke qetilkaran ra hesab nêame persayene ewro qirkerdişê neweyî benê. Ma domananê xo binê bombardûmanan de pîl kenê. Xakurkê herra ma ya, ganî ê helêk cuwa ver terk bikerê. Wa her kes naye hol bizano ke ma vera zulmî de milê xo çewt nêkenê. Hûma hêzê bido gerîlayanê ke ewro Xakurkê de bi gan û gonîya xo herra xo pawenê. Ez domananê ma yê qehreman rê minnetdar a.’’