CEOya Women For Justice Dr. Leyla Ferman bêvengîya komelê mîyanneteweyî ya vera hêrişanê serê Şingalî sey şermêka pîle pênase kerde û vat ke seba ke vera dewleta tirke dewa bêra akerdene ê xebitîyenê.
Derheqê hêrişanê dewleta tirke ya îşxalkere yê vera Şingalî de Women For Justice Komîteya Heqanê Merdiman a Neteweyanê Yewbîyayeyan rê gerre kerdbi. Dewleta tirke 17ê tebaxa 2021î de hîrê reyî bi droneyanê çekdaran hêrişê Şingalî kerdbi. Nê hêrişan de 8 kesî ameybî qetilkerdene û tewr tay 20 kesî birîndar bibî. Çar mexdûranê nê hêrişî bi rayîrê Serekê Yewina Hesabdayîşî ya Îngilîstanî Arîfe Abrahamî, Avûkate Tatyana Eatwell û Soraya Baunews muracatê Komîteya Heqanê Merdiman kerdbi. Avûkat Abrahamî no gerrekerdiş sey 'dewayêka krîtîke û sembolîke' pênase kerdbi
CEOya Women For Justice Dr. Leyla Ferman ANFyî rê qala prosedurê muracatî kerd.
Dr. Leyla Ferman pare kerd ke heta nika Komîteya Heqanê Merdiman a Neteweyanê Yewbîyayeyan cewab nêdayo muracatê înan û vat: ''Goreyê prosedurî ganî komîte gerrekerdişî ser o dewleta tirke ra cewab biwaza, cewabê ci biercna û bira xo bida. Ma 4 êzidîyan temsîl kenê ke şahîdê serebûtan ê. Ganî bira komîte ra dima derheqê dewleta tirke de dewa bêra akerdene. La heta nika Neteweyanê Yewbîyayeyan seba ney xîret nêkerd.''
Dr. Leyla Ferman bale ante hêrişanê dewleta tirke yê vera Rojawan, Başûr û Şingalî ser û ard ziwan ke bêvengîya mîyanneteweyî ya vera nê hêrişan şermêka pîl a. Dr. Leyla Ferman vat: ''Hêrişê dewleta tirke yê vera êzidîyan û waranê înan seke dewamê fermanî yê. Nê wextî de ke şerê Îsraîl û Gazze newe ra pîl bîyo ganî bi caardişê haştîya Rojhelatê Mîyanênî bêra kerdene. Seba haştîya Rojawan û Şingalî gamêke do bieşka pêro herême rê biba nimûne.''
