Îmkanê Şaredarîya Dêrsimî, seba viraştişê qeleqolan û Lîseyanê Îmam Hatîban yênê xerckerdene.

Tayînbîyayîşê qeyûmî ra dima milk û malê şaredarîye kesanê hetê îqtîdarî rê ameyî pêşkêşkerdene. Şaredarîye mabênê 2 serran de ameyî talan kerdene û kewte binê deynanê pîlan. Qeyûmî îmkananê şaredarîye seba xizmete nê seba rantî şuxulnenê û no raporanê Mahkemeyê Muhasebatî de zî ame bî eşkera. Qeyûmî goreyê pazarîye îhaleyan kenê û qet yewê xo goreyê qanûnan îhale nêvirazeno. Ma vizêrî marîfetê qeyûmê Şaredarîya Peyasî pare kerdîbî. Ewro zî ma bi qeyûmê Şaredarîya Dêrsimî dewam kenê.

Merkezê Elewîyan de projeye sunîtîye

Çemişgezek de Dibistana Îmam Hatîbî rê Mescîdî ameyo viraştene û îhale nêameyo kerdene. Nameyê firmaya ke no Mescîd viraşto belgeyan de nêameyo nuştene.

Pertag de  Dibistana Îmam Hatîbî rê Mescîd û Warê Sporî ameyo viraştene û no sey xerckerdişê şaredarîye ameyo musnayene.

Reyna cepheyê Awanîya Kursê Quranî yê merkezê Dêrsimî bi pereyanê şaredarîye ameyo newekerdene û Nîzamkerdişê Derûdorê awanîye rê pereye şaredarîye ameyê xerckerdene.

Mîlîtarîzm û Sunîtîye ardî pêser

Pêro îmkanê Şaredarîya Dêrsimî, bi destê Îdareyê Taybetî yê Bajarî, bi viraştişê qeleqolan, qereqolan û mudirîya ewlehîye rê ameyê xerckerdene

Qereqolê Cendirmeyan ê Gokçekî rê Kuleya Pawitişî ameya viraştene û no înşaat bê îhale dîyo yew fîrma.

Reyna Şaredarîye bedelê îhaleya boyaxê Awanîya Cerdimeyan a Bajarî girewta xo ser û pereyê şaredarîye pêşkêşê mîlîtarîzmî kerdê

Qisle de Qereqolê Cendirmeyan ê Ş. Mehmetî de, hetê yew firmaya nêzdîyê AKP’yî ra înşaat ameyo viraştene û pereyê na îhaleye butçeya şaredarîye ra ame dayene.

Zereyê Fermandarîya Cendirmeyan ê Bajarî de rayîrî ameyê viraştene û bedele na îhale zî butçeya şaredarîye ra ameyê dayene.

Reyna Lojmananê  Fermandarîya Cendirmeyan ê Bajarê Qisle de kare înşaatî ameyê kerdene û butçeya nê înşaatî zî şaredayîye daya.

Xozat de Fermandarîya Tugay a Pîyadeyan a 51’ine de projeya awaşimitişî bi butçeya şaredarîye ameya kerdene.

Çemişgezek de rayîr û binawanîya Qereqolê Cendirmeyan ê Toratliyî zî bi pereyanê şaredarîyê ameyê viraştene.

Mudirîya Ewlehîye zî para xo girewta

Belgeyan de eşkera aseno ke qereqol, qeleqol, awanîyê cendirmeyan ê qeza û merkezî bi pereyanê şaredarîye ameyê viraştene. Tena leşkeran nê, Mudirîya Ewlehîye zî butçeya şaredarîye ra para xo girewta.

Nuqtayê Ewlehîye yê Mudirîya Ewlehîye ya Tuncelîyî de xebatê sey viraştişê rayîran, binawanîyî ameyê îhalekerdene û bedelê nê îhaleyan butçeya şaredarîye ra ameyo dayene.

Çemişgezek de Awanîya Xizmete ya Mudirîya Ewlehîye ya Bajarî û Lojmanan de xebatê înşaatî ameyê îhalekerdene û pereyê nê îhaleyan hetê şaredarîye ra ameyê dayene.

 Taxa Ataturkî de lojmanê Mudirîya Ewlehîye hetê binawanîyî ra ameyê newekerdene û pereyê na îhaleye zî hetê şaredarîye ra ameyê dayene.