Êlih de çar ciwanan bi kirdkî, kirdaskî û sorankî aplîkasyonê 'Qurana Kurdî' viraşt. Aplîkasyon de vateyê verênan, nameyê domanan û derheqê tarîxê kurdan de agahîyî zî est ê. Aplîkasyonê 'Qurana Kurdî' App Store û Play Store ra eşkeno peyda bibo.

Ronî Bedirxano ke ferhengê aplîkasyonî viraşto derheqê xebatanê înan de Ajansê Mezopotamya rê qisey kerd.

Bedirxanî da zanayene ke înan bi wesîleya menga Remezanî bi hawayêkê bêpereyî aplîkasyon vist xizmetê şarê kurdî.

Bedirxanî bale ante ser ke ê seba mealê kirdkî nuştox Roşan Lezgînî reyde xebitîyayî û mealê bi kirdkî reyna hetê Roşan Lezgînî ra ameyo wendene. Bedirxanî vat: ''Ma rê baska tewr girînge ya xebata ma baska kirdkî bîye. Verî kirdaskî (kurmanckî) ser o xebatê winasênî ameybî kerdene, yew binge est bi la reya verêne bi kirdkî xebata winasêne yena kerdene.

Kesê ke wazenê wa Play Store û App Store ra aplîkasyonî peyda bikerê û bi kurdkî ayetanê Quranî goşdarî bikerê.''

Bedirxanî pare kerd ke nika zî hedefê înan no yo ke derheqê kultur û hunerê kurdan de aplîkasyonêkî bivirazê.