Parlamenterê HDP’yî yê Riha Omer Ocalanî derheqê xespkerdişê 3 şaredarîyanê bajaranê pîlan ê HDP’yî de ANF’yî rê qisey kerd.

Omer Ocalanî vist vîrî ke 19’ê Tebaxe ra nata vera qeyûman xoverdayîşêk esto û va: ‘‘Şar vera xespkerdişê îradeyî tewirê xo zelal ramojneno. Serê sîyasetê Kurdan ra hêrişêk esto la tena îradeyê şarê Kurdî nêameyo xespkerdene. Vera demokrasîyê Tirkîya zî qeyûm ameyo tayînkerdene. Hukmatê na dewlete na derbeya sîyasîye kerde. No hukmat çar paçeyanê Kurdistanî de vera Kurdan tewirêko dişmenkî domneno. Dewlete semedê teslîmgirewtişê îradeyê şarê Kurdî qeyûm tayîn kerdî.‘‘

Omer Ocalanî bale ante serê operasyonanê leşkerîyî yê dewleta Tirkî yê vera Kurdistanî ser û va: ‘‘Dewlete her hetî ra hêrişê Kurdan kena ke averşîyayîşê Kurdan bidê vindetene. Nêwazenê ke Kurdî seserra 21. de bibê wayîrê statuyî. Coka dewlete dest bi şerê psîkolojîk,sîyasî û leşkerîyî kerd. Ma sey sîyasetmedaranê Kurdan ganî vera naye xoverdayîş xurt bikerê. Nika meydanan de pîya bi şarê ma xoverdayîşê ma dewam keno. Şar ma dir rayra şino. Kurdan bedelê girdî dayî. Ewro şero ke 40-50 serrî cuwa ver estbi reyna ma vînenê. La ewro teknolojî aver şîyo, çîyê ke Kurdistan de benê heme dinya vînena. Bi qeyûman eşkera vera Kudan şer ame îlankerdene. Kurdan ser o qirkerdişêko cîdî esto. Nasnameyê Kurdan rê tahamul nêkenê.  Dewleta Tirkî seba ke Kurdî wayîr statuyî mebê heme rayîran xo rê mubah vînena. La ê do ser mekewê. Hemverê heme hêrişanê înan de şarê Kurdî sereberz payan ser o. Coka Kurdî do dahîna bihêz aver şirê û statûyanê dahîna holan  bifînê dest.‘‘