PDK û Hukmatê Bexdadî Şingalî ser o 9ê teşrîna verêne de peymanêke viraşte. Derheqê peymane de nîqaşî dewam kenê. 

Akademîsyen û pisporanê sîyasetî yê Başûrî ANFyî rê peymane û armancê ci ercnayî.

Pisporê sîyasetî Nîyaz Hemîdî vat: ''Peymane statuyê Şingalî binpay kena û rayîr dana dewleta tirke ke Şingal îşxal bikera. Peymane aslê xo de mabênê dewleta tirke û PDKyî de ameye kerdene. 2 mengî verê cû şefê MÎTî Hakan Fîdan PDKyî reyde Şingalî ser o pêkerd. La şarê Şingalî sey verî nîyo. Na peymane do kaxitan ser o bimana. Çira YNK û Goran vera peymane vengê xo nêvejenê? Hukmato Iraqî yo ke wazeno statuyê Şingalî çin bikero dewleta tirke û PDKyî rê hemkarîye keno.''

Akademîsyenê Zanîngehê Dihokî Dr. Hişam Zêbarîyî vat: ''Serra 2021î de Iraq de weçînayîşî do bêrê kerdene. Kazimî seba ke kurdî paştî bidê ci Tirkîya reyde plano winasên kerd.Eşkera yo ke Peymane vera PKKyî ya zî. PDK wazeno binê hukmatê Iraqî de agêro Şingalî û Meclîsê Şarî yê Demokratîkî û serdestîya hêzanê êzidîyan çin bikero. Eşkera yo ke na peymane de barê Erdoganî û dewleta tirke zî esto.''

Sîyasetmedar û nuştox Elî Kerîmîyî vat: ''Na peymane nîya rotişê Şingalî yo. Şingalijî 2 serran ra nata xo bi xo îdareyê xo kenê. Şingalijanê ke koç kerbi waşt ke abigêrê Şingal la PDKyî nêverda. Na peymane de yew tesîrê Iraq û Hewlêrî çin o. Temsîlkaro Taybet ê DYA yê Sûrîye James Jeffrey seba lobîya tirkan xebitîyeno. Jeffreyî zîyaretê xo yê Başûrî de seba ke vera hukmatê tirkî abikero tay xebatî kerdî. Nêbo PDK senî eşkeno bê YNK û Goranî peymana winasêne bikera. Her roje îdeolojî û paradîgmaya PKKyî herême ser o tesîrê xo zêdînena. PDK wazeno verê nê tesîrî bigêro coka pêro parçeyanê Kurdîstanî pêşkêş keno. Kerkûk de zî PDKyî heman çi kerd. Ez pê bawer a ke şarê Şingalî do nêverdo na peymane wa bêra caardene.''

Akademîsyenê Zanîngehê Dihokî Dr. Kamûran Berwarîyî vat: ''Ganî kurdî bizanê ke na peymane vera destkewteyanê înan yena kerdene. Dewleta tirke wazena kurdan û destkewteyanê înan çin bikera. Amerîka, Îsraîl, Ewropa  paştî danê Tirkîya. Peymana Şingalî vera destkewteyanê kurdan û Têgêrayîşê Azadîye yê Kurdîstanî yo. Eke peymanêke de Têgêrayîşê Azadîye Kurdîstanî, KNK û KCK çin bibê a peymane yena manaya tasfîyekerdişê înan û îşxalê Kurdîstanî. Na peymane hêverî armanc kena ke YBŞ û YJŞ tasfîye bikera, xoserîya Şingalî tasfîye bikera. NA peymane bi waştişê Tirkîya û Iraqî ameye kerdene û vera êzidîyan qirkerdişêko pîl o. Eke PDK cepheyê kurdan de ca bigêro cephe do bihêzêr bibo la heyf ke PDK cepheyê tirkan de yo. Kurdî têna bi Konfederalîzmê Demokratîkî û Sîstemê Xoserîya Demokratîke azad benê. Eke destkewteyê kurdan destî ra şorê hukmatê Herêma Kurdîstanî zî do bivisîyo erdî ro.''