Vera vîrusê Korona pêro dinya de tedbîrî dewam kenê. Labelê Tirkîya de peygoşîya hukmatî bi taybetî peygoşîya vera zîndanan bale ancena. Wezîrê Edaletî Abdulhamît Gulî verê cû pare kerdbi ke 3 tepişteyî zîndan de merdî.

Derheqê rewşa zîndananê Wanî de çîyêk nêno zanayene. Serdozgerîya Komare ya Wanî û îdareyanê zîndanan teberî reyde têkilîye birnaye, coka bi zor û zehmetî zîndanan ra xebere yena girewtene. Tepişteyê sîyasîyî têna pê telefonî eşkenê keyeyanê xo reye qisey bikerê. Wekîlê HDPyî yê Wanî Murat Sarisacî derheqê rewşa peyêne ya zîndanan de ANFyî reyde qisey kerd.

Sarisacî îfade kerd ke zîndanan de tepişteyê sîyasî yê ke yeno şikkerdene ke pê vîrusî kewtî yan zî testê înan pozîtîf vejîyayî, gêrîyenê binê karantîna. Sarisacî vat: ''Goreyê zanayîşanê keyeyanê tepişteyan zaf tepişteyî binê karantîna de yê la na rewşe yena mîyankerdene. Zîndanan de tehluke pîl o. Seba ke pêro tepişteyî vera bidîyenê karê partîya ma dewam kenê. La ganî berpirsîyarîyêka komelkî estba. Zîndanan de nêzdîyê 200 hezar tepişteyî terkê mergî bîyî. Dewlete cergê xo, terefgîrê xo û kiştoxî Korona ra pawitî. Eke xîretê partîya ma û paştdayîşê komelê sivîlî zêdê bibê ma do ser bikewê. Hukmatî vat 'ma tedbîr girewt' la nêgirewt. Goreyê mi na polîtîka pê zanayîşî yena kerdene.

Tepişteyê ke wedarîyenê revîrî, înan de çend persan persenê, derman danê. Sîstemê weşîye yê zîndanan wina yeno ca. Nika zîndanan de binê nameyê karantîna de tepişteyî erzenê hucreyê yewkesî. Ganî her kes nê prosesî de hîşyar û berpirsîyar bibo.

Hukmat komel nêfikirneno. Maske û dezenfektan pê pereyan roşenê. 3 kesan rê yew dezenfektan danê. Madeyê pakîye tay dîyenê. Ganî ma paştî bidê Kampanyaya Keyeyê Wayûbirayî û zindanan. Ganî weşîya tepişteyan seba ma rewşêka girînge biba.''