Qezaya Bismilî ya Amedî de ciwanê bi nameyê Ramazan Yalçinkayayî xo kişt. Yalçinkayayî verî ke xo bikişo facebook de mesajêk pare kerd.

 Yalçinkayayî mesajê xo de ard ziwan ke mergê ey ra kes mesuldar nîyo û o hînî pê 'şertanê cuye' nêeşkeno.

Hemşaredarê Bismilî yê HDPyî Orhan Ayazo ke herinda ci de qeyûm amebi tayînkerdene, twitter de îfade kerd ke Yalçinkaya tengasîya ekonomîke ra xo kişto. Ayazî vilakerdişê xo yê twitterî de wina vat: ''Eke şima butçeya şarî nêdayêne şer, terefgîranê xo û rantî ciwananê ma bêkarî û vêşanîye ra xo nêkiştêne.''

Ayazî eşkera kerd ke o şîyo şînê keyeyê Yalçinkayayî û keyeyî tira vat ke lajê înan sebebanê ekonomîkan ra xo kişt.