Endamê Komîteya Rayberdişî ya PKKyî Duran Kalkanî Medya Haber TVyî de rojdem ercna. 

Ercnayîşanê Kalkanî de nê noqtayî vejîyayî vernî:

''37 mengî yo Rayber Apoyî ra xeberêke nêna girewtene. Sey dezgehanê dewleta tirke dezgeh û rêxistinê Ewropa yê sey Konseya Ewropa zî verê tecrîdê Îmraliyî de bêveng ê. No zî mojneno ke nê hemkarê dewleta tirke yê. Ganî vera tecrîdî her kurd/e mîyanê çalakîyan û têkoşînî de bibo/a. Seke zanîyeno dostanê ma seba azadîya Rayber Apoyî 10ê teşrîna verêne de hemleyêka globale dabî destpêkerdene. Na hamle 8ê Adare û Newroze de bîya pîlêr û tesîrê weçînayîşanê 31ê adare kerd. Nika verê ma de 1ê Gulane est o. Ganî ma 1ê Gulane de na hemle biresnê lewe û her ca de seba azadîya Rayber Apoyî biqîrê. 

Îqtîdarê AKP-MHPyî vera ma mîyanê amadekarîyanê şerêkê neweyî de yo. 22yê nîsane de Erdogan do şoro Bexdad, dima zî şoro Amerîka. Erdogan gêreno mutefîqanê xo yê şerî û hêrişanê vera kurdan meşrû bikero. Erdoganî hem weçînayîşanê 31ê adare de hem zî Zap de zimistan de destê gerîlayan ra derbê giranî werdî. Nika Erdogan gêreno ke bi hêrişanê vera kurdan binkewtişê xo binimno. Erdogan se keno wa bikero do nêeşko verê rijîyayîşê AKPyî bigêro. Ma do hêrişanê înan ê neweyan ê muxtemelan zî pûç bikerê.

Kurdîstanî weçînayîşanê 31ê adare de rayîr nêda faşîzmî û serkewtişêko pîl vist destî. Şarê kurdî qeyûmî sindoqan de xeniqnayî. Wan de vera xespê îradeyî xoverdayîşêko pîl ame kerdene. Beno ke îqtîdarê AKP-MHPyî newe ra hêriş bikero. Ganî her kes vera nê hêrişan de amade û bitedbîr bibo. Wa her kes xo ver bido û cayêkî zî teslîm nêkero. 

Tirkîya de prosesêko newe est o. Hinî faşîzm do birijîyo. Şarê kurdî rixmê pêro tedayan û zorbazîyan zî apey gamêke nêeşte û xover da. Kurdî hêzê demokrasîyî yê. Kam meseleya kurdan çareser bikero o zî do ser bikewo. Ma do bivînê ke CHP na babete de senî têbigêro. Eke CHP xo newe bikero û demokratîk bibo eşkeno bibo îqtîdar. 

Gerîlayan zimistanî ra nata morê xo da binê prosesî ro. Bi taybetî gerîlayan operasyonanê şorişgêran de serkewtişê pîlî vistî destî. Herinda gerîlayan de kamyew artêşe est biba do nêeşkayêne sey gerîlayan şer bikerdêne. Artêşa tirke ya ke qaşo artêşa NATOyî ya pîlêr a, pê xoverdayîşê gerîlayan nêeşkena. 40 serrî yo artêşa îşxalkere verê gerîlayan de bin kewena. Zap de artêşa îşxalkere kewta zereyê mezelê xo. Înîsîyatîf hinî destê gerîlayan de yo. Ma prosesêkê krîtîkî de yê la amadekarîyê gerîlayan tim est ê. Erdogano ke dişmenîya kurdan keno peynîya ci do biba sey yê Saddam Huseyînî. 

Îdareyê ma rewşa Wanî sey ruhêkê neweyî û terzêkê neweyî ercna. No ercnayîş raşt o. Ganî tim wina bibîtêne. Wanî ra dima no ruh Şirnex de zî ame dîyene. Vera şarê ma, cinîyan û ciwananê kurdan dewleta tirke şerê taybetî kena. Wan de ciwanan hêrişkerî pêrîşan kerdî. Şirnex de ciwanan çawişo pispor o tecawuzker tepişt. Wan û Şirnex de ruhêko newe vejîya werte  ke no ruh tewirêko welatperwer û şorişgêr o. Ganî no tewir hertim û her ca de bêro mojnayene. Xopawitiş û rêxistinîye şertê verênî yê. Vera şerê taybetî şero şorişgêr lazim o.

Ez şarê Wan û Şirnexî fîraz kena û selam kena. Tewirê înan ganî her kesî rê bibo nimûne. Tewirê înan mojna ke eke ma têkoşîn bikerê do ser bikewê. Ganî vera her hêrişê AKP-MHPyî no tewir bêro girewtene. Şarê kurdî, cinî û ciwanî, ma pêroyî bingeyê ruhê xoverdayîşî yê Wan û Şirnexî de ganî xo newe bikerê.  Ganî ma do çewî ra çîyêkî nêpawê û înîsîyatîf bigêrê. Ciwanî teda û xizanîye ra verê xo danê teberê welatî. La ciwanî ganî xo emanetê Ewropa nêkerê, verê xo bidê koyan. Wa ciwanî rêxistinîya xo xurtêr bikerê û tim hişyar bibê.

Îranî hêrişê Îsraîlî kerd. La Îsraîl û Erdoganî seba hêrişî Îran tehrîk kerd. Erdoganî tedaya Îranî kerd ke ey tewrê şerî bikero. Ma şeran tesdîq nêkenê. Şerî xizmetê emperyalîst û kolonyalîstan kenê.  Ma venga pêro şaranê herême danê ke çareserîye sîstemê Konfederalîzmê Demokratîkî de ya. Ganî pêro hêzî seba haştî û aramîye têkoşînê caardişê nê sîstemî bikerê.''