MEBYA-DERî Goristanê taxa Şehîtlîkî ya qezaya Yenîşehîrî ya Amedî de derheqê cenazayan de ke nêdîyayê keyeyanê ci, eşkerayîye daye. Endam û îdarekarê MEBYA-DERî û keyeyê gerîla Hatîce Gunduz beşdarê eşkerayîye bîyî.

Destpêk de Hemserekê MEBYA-DERî Şeyhmus Karadagî qisey kerd. Karadagî vist vîrî ke Şêx Seîdî ra heta nika bi serran o ke cenazayê kurdan vînbîyaye ê, nêdîyenê keyeyanê ci û vat: ''Hema zî vera cenazayan îşkence yeno kerdene û gorî yenê texrîbkerdene. Ma wazenê hînî dadîyî biresê esteyanê domananê xo.''

Gerîlaya PKKyî Hatîce Gurbuza ke serra 1996î de qezaya Qisle ya Dêrsimî de şehîd bibî û uca de amebî definkerdene. Dadîya şehîde Hatîce Mewlude Gunduz zî eşkerayîye de qisey kerd û da zanayene ke kênaya ci 10 embazanê xo reyde şehîd bîye û vat: ''Şaredarîye a uca de defin kerda. Ganî ma wayîrê domananê xo vejîyê. Tira parçeyêk zî bimano ez wazena kênaya xo rê gorêk viraza. 10 gorî têkişt ê û keyeyê tayê înan nêzanîyenê. Ganî nê keyeyî zî bêrê û wayîrê kênayanê xo vejîyê. ''

Dayîke Mewlude selahîyetdaranê dewlete ra waşt ke seba testê DNA înan ra gonî bêra girewtene û esteyê domananê înan bêrê dayene.