Gerîlayê HPGyî Kasim Kaya (Şoreş Andok) 21ê temmuza 2021î de Agirî de pêkewtişêk de şehîd bibi. Keyeyê Kayayî rixmê hende muracatan zî nêeşkeno di serrî yo cenazaya xo bigêro.

Waka Kasim Kayayî, Hanime Kaya Ajansê Mezopotamya rê derheqê babete de qisey kerd. Hanime Kaya da zanayene ke înan seba testê DNA nîmuneya gonîye dabî dozgerîye û vat: ''Testî ra 6-7 mengan dima zî agahîyêke nêdîyaye ma. Dima reyna ma ra test ame waştene û 2022 de ma reyna gonîye daye.  La hema zî testî ra xeberêke çin a. Ma zaf reyî waştişnameyî dayî dozgerîya Agirî. Înan zî tewr cewab nêda ma.''

Hanime Kaya îfade kerd ke dewlete qestî ra cenaza nêdana keyeyî û vat: ''Dewlete seba ke keye bidejo û aciz bibo cenazayan nêdana. Qet yew dînî de çîyo winayên çin o. Dewlete cenazayanê ma ser ra sîyasetî kena û keyeyan rê îşkence kena. 10 serrî şêrê zî ma do cenazaya xo biwazê. Sey ma zaf keyeyî est ê. Ez venga înan zî dana ke wa qetî cenazayanê xo ra fek vera medê û cenazayanê xo bigêrê.''