Nuştox, çarnayox û şaîr Zeynel Abîdîn Xanî 25ê sibate de şaristanê Berlinî yê Almanya de krîzê qelbî ra wefat kerd û şaristanê Gimgimî yê Mûşî de ame definkerdene.

Cenazaya Zeynel Abîdîn Xanî hetê keye û merdimanê ci ra meydanê teyarayan ra ameye girewtene û bi wesayîtê cenaza yê Şaredarîya Mûşî ameyêne berdene bi welatê ci Gimgim. Polîsan konvoyê cenaza noqtaya kontrolî de bîlasebeb vindarna. Konvoy wextêkê dergî ra dima reyna  kewt rayîr la na reye zî bi fermanê Serekê AKPyî yê Mûşî Feyat Asyayî konvoy rayîrê Gimgim-Mûşî de ame vindertene û cenaza wesayîtî ra ameye warardene.

Cenazaya Xanî bi pîkapêkê konvoyî ameye berdene bi Gimgim. Şarê Gimgimî bi hawayêkê girseyî waşt ke tewrê cenaza bibo la polîsan Gimgim de zî şar asteng kerd ke tewrê cenaza nêbo. Polîsan destûr da ke têna merdim û keyeyê Xanî tewrê merasîmê definî bibê. Îmamî zî bi fermanê qeyûmî nimajê cenazaya Xanî nêard ca. Cenazaya Xanî ameye berdene bi Cemxaneyê Gimgimî û nimajê ci hetê merdiman û keyeyê ci ra ame kerdene. Şînê Xanî keyeyê ci de yeno kerdene.

Zeynel Abîdîn Xan kam o?

Zeynel Abîdîn Xan bi seyan kitabî sey ''Ey Serxwebûn”, “Siya Çûyinê”, “Bagera Nergizan” û “Stran Digotin” nuştî û bi serran sîyasetê kurdî mîyan de têkoşîn kerd. Zeynel Abîdîn Xanî semedê sîyasî ra zîndan de mend û semedê teda ra surgunê Berlinî yê Almanya bi. Xanî bi kirmanckî û kurmanckî zaf kitabî nuştî û bi seyan kitabî açarnayî. Xanî serranê 2003-2007î de Berlin de Weşanxaneyê Evra na ro û edîtorîya ci kerde. Lajê Xanî Gazîn Onur Xan serra 2007î de Weşanxaneyê Xanî na ro û Zeynel Abîdîn Xanî edîtorîya nê weşanxaneyî zî kerd.  Zeynel Abîdîn Xanî serra 2015î ra nata edîtorîya Xwenasê kerdêne.