Gerîlayê YJA Starî Dicle Eylem (Leyla Gulcu), Gulbahare Mercan (Şekirnaze Kaplan)  û Eyleme Munzur (Emine Kaplan) ê ke 4ê tebaxe de bombardumanê dewleta tirke yê vera Bagokî de şehîd bîyî, cenazayê înan badê 143 rojan dîyayî keyeyanê înan.

Bado ke netîceyê DNA safî bîyî, vizêr merdimê hîrê gerîlayanê cinîyan ameyî Mêrdîn. Cenazayî nêdîyayî heta ke hewa bi tarî. Dima ra merdimê şehîdan şîyî goristanê bêkesan ê Goristanê Bajarî yê Kamorî yê qezaya Artûkluyî û pîya bi polîsan û wezîfedaranê goristanî cenazayê xo girewtî. Keyeyan bi wesayîtanê cenaza yê ke bi îmkananê xo tepiştî, cenazayê xo berdî memleketanê xo.

Şehîdan ra Dicle Eylem Amed de, Eyleme Munzur Êlih de û Gulbahare Mercan zî Xîzanê Bedlîsî de ameye definkerdene.