Programê cenaze yê parlamenterê kehenî yê HDPyî Îbrahmî Ayhano ke çend rojî verê bajarê Hewlêrî de netîceyê krîzê qelbî de wefat kerdbi, dîyar bi. Seba Ayhanî merasîmo sifteyîn do saete 10.00 de Temsîlkarîya HDPyî ya Hewlêrî de bêro viraştene.

Cenaze do dima ra bi hawayo konvoy Berê Sînorî yê Xebûre ra bêro qezaya Silopî ya Şirnex. Ewja de saete 15.00 de hetê konvoyêkî ra bêra girewtene û konvoyê cenaze do rayîrê Silopî, Cizîr, Nisêbîn, Qoser, Wêranşar ser ro bêro Sêwregi.

Cenazeya ke do saeteanê şewe biresa Sêwregi, do neqlê morgê nêweşxaneyê dewlete biba.

Cenaze roja dişeme saete 11.30 de nêweşxane ra do bêra girewtene û bi merasîmêkî Goristanê Nato yê Sêwregi de bêra defin kerdene.