Mercane Erkol (Bêrîtan Tolhildan) a HPGyîje 16ê teşrîna peyêne de 12 embazanê xo reyde herêma Guhermî ya Pasûrî ya Amedî de şer de şehîd kewte. Dima ke HPGyî 17ê adara 2019î de pare kerd ke 12 gerîlayê înan şehîd kewtî û înan ra yew zî Mercane Erkol a, keyeyê Erkole seba ke aqîbetê kênaya xo bimuso şi Fermandarîya Cendirmeyan a Amedî. Fermandarîya Cendirmeyan zî keye erşawit Pasûr ke Mercane Erkol tede şehîd kewte.

Babî Hisen Erkolî muracatê Mehkema Pasûrî kerd. Mehkema Pasûrî zî hûmara dosyaya cenaze daye û Erkol reyna erşawite Fermandarîya Cendirmeyan a Amedî. Tîya de waştişê fermandarîye ser o Erkol seba DNA şi gonî daye û agêra fermandarîye. Fermandarîye na reye zî ci rê vat ke ''Key netîce eşkera bibo ma do xebere bidê to."

Çar mengan ra dima fermandarîye gêrîya babî Erkol û vat ke wa cenazeya xo bigêro. Erkol şi ame fermandarîye û selahîyetdaran reyde şi Goristanê Yenîkoyî. Uca de beşê bêkesan de 3 cenazeyê parçebîyayeyî keye rê ameyî mojnayene. Dozgerî naye ser o vat: "Heta ke DNA yewbînan tam nêtepişê ma nêeşkenê cenazeyan bidê şima." Dima babî Erkol reya agêra Wan û muracatê ÎHDyî kerd. 22ê kanûne de reyna ame Amed. Hesinî bi rayîrê avûkatî reyna muracatê dozgerîye kerd û dima şi muracatê MEBYA-DERî kerd.

Babî Erkolî pare kerd ke 9 meng ê ke selahîyedarî înan meşxul kenê û vat: "Gelo Îslamîyet de heq û huqûq de çîyêko winasên esto? Heqaretêko winasên o ke cenazeyan rê kenê nêno qebulkerdene. Na çend rey a ke ez yena û şina. Na bêedaletîye, bêwîjdanîye û bêmerdimî ya. Seba ke ma kurd ê wina kenê."