Taxa Cendele ya qezaya Wêranşarî ya Riha de dibistana mîyanêne de domanê 16-17 serrî M.S.A., E.A., A.A.û B.A. bi bahaneya ke alaya tirkan a dibistane arda war ameyî destbendkerdene û ameyî berdene bi qereqolê cendirmeyan.

B.A. îfade ra dima vera dîya la hîrê domanê bînî sewqê edlîye ameyî kerdene. Dozgerîye bi îdîaya 'alaya serwerîya dewlete qij kerda' bi waştişê tepişîyayîşî domanî sewqê Hakîmîya Cezaya Sulhe kerdî. Hakîmîye domanî bi şertê kontrolê edlîyî vera dayî.

Domanan hakîmîye de dîyar kerd ke taxe û qereqol de leşkeran înan rê îşkence kerdo û gerreyê înan kerd.

Domanî şîyî Nêweşxaneyê Dewlete yê Wêranşarî û înan raporê derbe girewt.