Derheqê xebatanê Kampanyaya Keyeyê Wayûbirayî de Hemserekê HDPyî yê Amedî Zeyyat Ceylanî ANFyî reyde qisey kerd.

Ceylanî vat: ''Tirkîya de nê prosesê vîrusê Korona de zî îqtîdar têna xo fikirîyeno. Dewlete wazena Tirkîya û Vakurê Kurdîstanî de komelêkê xizanî biaferna. Bi taybetî Kurdîstan de 20 serranê peyênan de wazena pê xizanîye şar terbîye bikera. Ma waşt ke nê prosesî de meseleyî çareser bikerê. Îqtîdarî herême de seba şarî çîyêk, amadekarîyêke nêkerde. Seba ke ma bieşkê xizmetê şarê xo bikerê ma di xetan ser o dest pê xebate kerd. Yew vera vîrusê Korona xopawitiş, o diyîn zî ma hetkarîya merdiman bîyî. Ma waşt ke nê rojanê zehmetan de ma bieşkê cîranî, embazî û hemkarîye aver berê coka ma dest pê na kampanya kerd. Ma resayî 11500 keyeyan. Rêxistinanê xo yê şaristanan û qezayan ser o ma xo resnenê keyeyanê xizanan. Reyna zanayîşê ke dezgeh û sazgehê komelê demokratîkî ma reyde pare kenê ser o ma resenê înan.  Dewe û qezayan de komîsyonê ma estê û xebatanê ma îdare kenê. Reyna keyeyê ke wazenê xo biresnê ma  pê rayîrê medyaya komelkîye û hûmara telefonî gêrenê rêxistinanê ma. Şewe û roje ferq nêkenê kam wext beno wa bibo ma hetkarîye resnenê şarê xo.

Heyf ke îmkanê partîya ma zêdêr nîya. Ganî hemwelatîyê ke îmkanê înan estê tewrê kampanya bibê û destê cîranî û hemkarîye derg bikerê. Wext wextê cîranî, embazî û hetkarîye yo. Ganî pêro cîranî wayîrê yewbînan bivejîyê û destê hetkarîye û paştdayîşî yewbînan rê derg bikerê. Pêro Kurdîstan û Tirkîya de heta nika ma 650 keyeyan rê, Kurdîstan de zî heta nika 300 keyeyan rê hetkarîya paketa zexîre kerde. Çarçewa Kampanyaya Keyeyê Wayûbirayî de ma xo resna 850 keyeyan. Tirkîya û Kurdîstanî de mabênê 1250 keyeyan de bingeyê wayûbiratîye ame awankerdene. Wexto ke ma hetkarîye kenê ma nêvanê ke înan rey da HDP yan ney. Ma bi hawayêkê têdûştî xebata xo kenê û xîret kenê ke hetkarîya xizanan bikerê. Ma awil keyeyê hewcedar tesbît kenê. Ma keyeyê hewcedarî rê telefon kenê û eke keye biwazo paketa ci ma benê eke nêwazo yeno paketa xo beno. ''