Dewa Oymadalî ya qezaya Mazgêrdî ya Dêrsimî de hewteyêkî ra verî şewat vejîya. Şewat de keyeyê dadîya 6 domanan Sultane Murat zî pê pêro eşyayanê ci vêşa û bi wele. Sultane Murat nika domananê xo reyde keyeyê mêrdeyê xo de manena û pê hetkarîya cîranan xo devirnena.

Mêrdeyê Sultane Murat  17 serrî verî qezayê madenî de binê kerrayan de mend û nêeşkeno bixebito. Sultane Murate pê şitê mangayanê xo kena ke debarê xo bikera û ana ziwan ke seba viraştişê keyeyêkê neweyî îmkanê ci çin ê.

Sultane Murat vat: ''Cirananê baqlîyat û tay eşyayî dayî ma. Ma nika keyeyê vistewreya mi de manenê la eke ê bêrê ma neçarî yê ke şorê yewna ca. Ma nê zimistanî de şinê ça, se kenê nêzanena. Ma Mudirîya Afetan a Dêrsimî ra hetkarîye waşte la înan xeyme nêdaye ma.''

Sultane Murat pare kerd ke pêro kinc û kolê domananê ci zî şewat de vêşayî û ê nika zaf zehmetîye ancenê. Sultane vat: ''Hewceyê ma pê kinc û cilan estê. Pawitişê nan û werdî zehmet o. Ma nê serdî de şinê teberî ra awe gênê. Eke vewre bivara ma hîna zaf zehmet ancenê. Ez û domanê mi ma yew oda de manenê. Mêrdeyê mi zî nêweş o.''