Vîrusê Korona Tirkîya û Kurdîstanî de roje bi roje zêdîyeno. Selahîyetdarê dewleta tirke vanê ke hûmara nêweşanê Korona bîye 2433 kes û heta nika 59 kesî Korona ra merdî. La rêxistinê weşîye vanê ke hûmara rastikêne zêdêr a. Cinîyêka ciwane ya ke Nêweşxaneyê Cigêrayîşî û Perwerdeyî yê Gazî Yaşargîlî yê Amedî de binê karantîna de ya ajansê ma reyde qisey kerd. Keyeyê na cinîye ra 10 kesî zî pê vîrusê Korona kewtî û nêweşxane de yê.

Cinîya ke nêwaşt nameyê xi eşkera biba ard ziwan ke merdimanê înan ra ke Swîsre ra ameyî ra înan nêweşîya Korona girewte û vat: ''Merdimê ma ke seba testî şîyî nêweşxane testê înan hîrê rojan ra dima eşkera bîyî. Dima ma zî keyeyê ma ra zî 10 kesî seba kixe, dejê sereyî û serdgirewtişî ma şîyî beşê lezabezî yê Nêweşxaneyê Gazî Yaşargîlî. Ma vistî binê karantîna. Dima doktorî ameyî û mi rê vat ke testê mi pozîtîf vejîya. Dima fek û pirnikê mi pê awêke girewtî û ez hema zî nê halî de ya. Goreyê doktoran netîce hîrê roja ra dima yeno. Doktorî nênê hetê ma û ma de eleqeder nêbenê. 

Çend rojan o ke ez nêweşxane de ya. Rojêke de di reyî germîya leşê mi peymenê. Ê zî xo pawenê û xo ma ra dûr gênê. Şert û mercê nêweşxaneyî zî xirab ê. Dermanan ra bigêre her çî verê berî de verdene û doktorî fekê berî de ma reyde qisey kenê û cade ber canêno ro. Dermanê ke danê ma sey parol pêro seba kêmkerdişê dejî yê. Heta nika mi doktoran ra çira pers kerd cewab nêda mi. Têna vanê ê zî çîyêkî ra xeberdar nîyê.

Keyeyî ra rewşa apê mi, dezaya mi û apkênaya mi baş a. Pê rayîrê telefonî ma qisey kerd û ê zî vanê ke doktorî înan reyde eleqedar nêbenê. Seba kêmkerdişê dejî derman zî înan rê nêno dayene. ''