Tecrîdê Îmraliyî yê vera Rayberê Şarê Kurdî Abdullah Ocalanî her ke şino yeno girankerdene. Cinîyanê Kerkûkî yê Başûrê Kurdîstanî derheqê babete de ANFyî rê qisey kerd.

Endama Rêxistina Cinîyanê Azadîgîran a Kurdîstanî (RJAK) Kelsûme Mihemed destpêkê qiseykerdişê xo de azadîya Ocalanî waşte û vat: ''Heyf ke Rayber Apo 18 mengî yo binê tecrîdê girankerdeyî yo. Ganî rêxistinê ke qala heqanê merdiman kenê, vera nê tecrîdî bêveng nêbê û seba ke Ocalan bieşko avûkatanê xo bivîno xîret bikerê. Ma sey cinîyanê Kerkûkî tecrîdî şermezar kenê û vanê ke wext wextê azadîya Rayber Apoyî ya.''

Cinîya aktîvîste Xelate Şiwanî zî bale ante tecrîdê Îmraliyî ser û vat: ''Birêz Ocalanî tim xîret kerdêne ke cinîyî heqanê xo bivisnê destî û azad bibê. Dewleta tirke hertim neteweyanê bînan sey dişmenî vînena. Birêz Ocalan seba cinîyan rayberêko ercîyaye yo. Ez sey cinîyêka kerkûkije û aktîvîste azadîya Ocalanî wazena.''

Cinîya welatperwere Leyla Cuma vat: ''Erkê pêro kurdan o ke azadîya Rayber Ocalanî biwazê. Rêxistinê heqanê merdiman vera tecrîdî bêveng ê. Rayber Apo averberdiş û serkewtişê cinîyan de wayîrê rolêkê bitesîrî yo. Azadîya Rayber Ocalanî yena manaya azadîya Kurdîstanî. Coka welatê hegemonîkî tecrîdî kenê. Ma azadîya Rayber Ocalanî wazenê.''