Endamanê Meclîsê Ciwanîye yê HDP’yî yê Mêrdînî bale ante rolê ciwanan ê rayberîye ser û ciwanan ra waşt ke ça benê wa bibê wa vera hêrişan vengê xo berz bikerê.

Endamanê Meclîsê Ciwanîye ra Buşra Koyun a ke ANF’yî rê qisey kerd  qeyûmî sey hêrişê vera destkewteyanê cinîyan, ciwanan û heme Kurdan hesibna û va: ‘‘Ganî vera naye cinî û ciwanî vejîyê kuçeyan.Cimatan de rayber cinî û ciwanê û cayê înan zî tim vernîya sefanê xoverdayîşî yo. Ma veng danê ke wa heme ciwan û cinî vejîyê kuçeyan. Çalakîya vengvetişî, tîlîlîantişî çi beno wa bibo ganî vera hêrişan razînêbîyayîş bêro ramotene. Eke kuçeyî qedexeyê, Ma vejîyê pencrayan, serê banan se beno wa bibo ganî ma vera polîtîkaya qeyûmî bêveng memanê û tewirê xo ramojnê.‘‘

Hamza Yildirimî zî vist vîrî ke raya dîyin a ke qeyûm Şaredarîya Mêrdînî de yeno caardene û va: ‘‘Ma qeyûmê verênî ra zanê ke no qeyûm zî senî  do hêrişê destkewteyanê ciwanan bikero. Şaredarîyanê HDP’yî semedê averşîyayîşê ciwanan wareyê sey kultur,huner, perwerde û tewr muhîmî zî cayê sey xo resnayîş berzkerdişê hişmendî pêardîbî. La qeyûman hêrişê înan kerd û heme werte ra wedartî û bizanayîş  verê ciwanan açarna hetê fihûş û madeyê heşberdoxî. Wareyê ke ciwanî tede xo û kulturê xo nas kenê û xo aver benê ameyî çînkerdene. Qeyûmî bi planêkê taybetî hêrişê cinî û ciwananê Kurdan kenê. Ma do vera naye xoverdayîş gird bikerê. Ma veng danê heme ciwanan ke wa vernîya sefanê xoverdayîşî de cayê xo bigêrê.‘‘