Kampa Multecîyan a Şehîd Rustem Cûdî de endamanê Têgêrayîşê Ciwananê Mexmûrî (TCM) û Têgêrayîşê Cinîyan ê Ciwanan ê Mexmûrî (TJCM) tecrîd û cezaya dîsîplînî yê vera Rayberê Şarê Kurdî Abdullah Ocalanî protesto kerdî.

Ciwanan vera cezaya dîsîplînî ya dewleta tirke ya îşkalkere ya ke Rayberê Şarê Kurdî Abdullah Ocalanî û 3 tepişteyanê bînan rê yena kerdene rayraşîyayîşêk kerd. Rayraşîyayîşê ciwanan Dibistana Amadeyî ya Şehîd Koçerînî de dest pêkerd û heta Merkezê Kultur û Hunerî yê Mexmûrî (NÇHM) dewam kerd. Rayraşîyayîş de ala û posterê Rayber Apoyî, KCKyî û pankarta ''Tecrîd bişiknê, Faşîzm birijnê, Kurdîstan azad bikê'' û ''Sere wedarê Rayber Apo azad bikê'' ameyî kiriştene. Seba şehîdan deqayêkê rêzgirewtişî ra dima hetê vervatoxa TJCMyî Kajîne Ozek ra eşkerayîyêk ameye wendene.

Eşkerayîye de nê ameyî parekerdene: "Polîtîkayê înkar û îmha yê ke hêzê hegemonî û îqtîdarî vera kurdan xebitnenê hema zî dewam kenê. Vera nê polîtîkayan bîyayîşê neteweya demokratîke alternetîfê cuyêka azade yo. Nê ecîzîye û tengîye ra hêzê serdestî bi hawayêkê barbarî hêrişê kurdan kenê. Xoverdayîşê şarê kurdî û serewedaritişê Rojhelatê Mîyanênî danê eşkerakerdene ke cuyêka azade û demokratîke ra ber cuyêke nêna tesdîqkerdene. Hêzê destserî ganî baş bizanê ke kilîtê çareserîya na alozîye ya Rojhelatê Mîyanênî destê Rayber Apoyî de yê. Ma sey ciwananê Mexmûrî zanenê ke dişmen se keno. Coka ma cezaya dîsîplînî û tecrîdê Rayber Apoyî protesto kerdî. " Rayraşîyayîş bi slogananê ''Biciwîyo Serek Apo'', ''Bêserek cuye nêbena'', ''Bimiro faşîzmê Erdoganî û hemkaranê ey'' qedîya.