Ciwanê kurdî Mazlum Dag û Mehmet Beşîksîz ê ke yeno vatene Restotanê Hoqqabazî yê Hewlêrî de Berpirsîyarê MÎTî yê masaya Îranî û Başûrê Kurdîstanî de Osman Kose kişt, mîyanê cerganê DAÎŞî de yenê tepiştene.

Hewlêr de 17ê temmuza 2019î de restoranê Hoqqabazî  de berpirsîyarê MÎTî ya masaya Îranî û Başûrê Kurdîstanî Osman Kose amebi kiştene.

Asayîşê PDKyî bi îdîaya kiştişê Koseyî di ciwanê kurdî yê welatperwerî Mazlum Dag û Mehmet Beşîksîzî reyde 3 kesî bî îdîaya hekarîye tepiştbî.

Mazlum Dag, Mehmet Beşîksîz û 3 kesê bînî yê ke bi hetkarîya înan yenê sucdarkerdene Asayîşê PDKyî de bi rojan ameyî cigêrayene û îşkence bi nînan ame kerdene. Eşkera bi ke îdarekarê payeberzî yê MÎTî zî tewrê cigêrayîşî bîyî.

Cezaya dardekerdişî ameye dayene, mîyanê cerganê DAÎŞî de yenê tepiştene!

Roniştişê dewaya Dagî û Beşîksîzî û ê kesanê bînan 11ê sibata 2020î de Hewlêr de ame kerdene. Roniştiş de Mazlum Dag û Mehmet Beşîksîzî rê cezaya dardekerdişî ameye dayene. Bire mîyanê şarê Başûrê Kurdîstanî de bîye semedê nêrazîbîyayîşan.

Eşkera bi ke PDK dag û Beşîksîz mîyanê cerganê DAÎŞî de tepişneno. Goreyê zanayîşanê ke wezîfedaranê zîndanî ra ameyî girewtene, qedîyayîşê mehkeme ra dima Mazlum Dag û Mehmet Beşîksîz beşê DAÎŞî de ameyî cadayene. Wezîfedaran pare kerd ke no bi waştişê Tirkîya ame kerdene û seba ke Başûr de cezaya dardekerdişî nêna caardene, bi nê hawayî wazenê ke DAÎŞijî ciwananê kurdan bikişê.

Nêrazîbîyayîşê şarî

Dima ke serebût ame eşnawitene şarê Başûrî vera rewşe nêrazîbîyayîşê xo mojna. Şarê Başûrê Kurdîstanî vano nêbeno ke ciwanê kurdî mîyanê cergan de ke sereyê kurdî cê ra kerdî, cinîyê kurdî remnayî û bazaran de rotî bêrê tepiştene. Bi taybetî şarê Başûrî yê Duhokî, Zaxo û Hewlêrî na rewşe ra zaf ecîz o.