Nuştox, Rojnager û Çimdaro Sîyasî Hasan Cudîyî derheqê macîranê kurdan ê ke sînorê Belarusî de tengayî ancenê û rewşa Kurdîstanî de ANFyî rê qisey kerd.

Cudîyî vat: ''Sîstemê îqtîdarê Başûrê Kurdîstanî krîzî ra zî ravêrt, rewşe zaf giran a.  Na rewşe tesîrê heme hetan kena û komel bi kaosî rî bi rî maneno. Sîstemî çimê xo felaketan rê qefilnayî. Coka komel zî sey tewirêk bar keno. Îqtîdarî çend serranê peyênan de sîstemê îdare û ekonomî serûbin kerd. Tekîlîyê komelkî helisîyayî, karekterê kurdî heybetê xo vînî kerd. Wina yo îqtîdar esto ke 45 serran de baregehê leşkerî yê dewleta tirke Başûrê Kurdîstanî de ca kerdî, bi seyan aktîvîst û rojnamegerê bêsûcî bîlasebeb eştê zîndanan. Bêşik komel vera nê zulmî tewirê xo ramojneno. Şar tewrê vîjnayîşî nêbeno û êyê ke rey şuxulnenî zî zafê înan îqtîdarî nêdanê.

Hetê bîna ra xora Tirkîya zî semedê bedilnayîşê demografîya herême gurîyena. Bi hewayêkê sîstematîkî bitaybetî ciwanî herême ra yenê vetene ke demograrî bêro bedilnayene. Tirkîya bi paştdayîşê tay hêzanê herême wazena ciwanî bar bikerê, erdê xo ra vejîyê û herinda înan de erebanê sunîyan ca bikero. Tirkîya semedê nê waştişê xo torrê qaçax û ajanî nayî ro ke ciwanan bişawê Ewropa. Di sebebê barkerdişê hemwelatîyan estê. Verên tewirê vera îqtîdarê Başûrî yo, diyîn zî bedilnayîşê demografîya herême yo.''

Cudîyî wina dewam kerd: ''Vatişê êyê ke vejîyenê Ewropa 'welatper nîyê' xelet o. Komelê Başûrê Kurdîstanî se de 95 vera îqtîdarî yo. Îqtîdar zalim o û xizmetê îşxalkeran keno. Bêşik kesê ke bar kenê herinda şîyayîşî de erdê xo de vinderê û vera îqtîdarî têkoşîn bikerê holêr bîyênî. La no barkerdiş têna qismêkê tewirê vera îqtîdarî yo. Zafê komelî ke îqtîdarî nêwezeno cayê xo de maneno. Başûr de trajedîyêke qewimîyena. Îqtîdar herinda raşt qiseykerdiş û rewşe çareserkerdişî de senaryoyan nuseno la qiymetê vatişê înan xora çîn o. Bawerîya şarî pê înan çîn a.''

Cudîyî qiseykerdişê xo pê nê vatişan qedîna: ''Dewletê Ewropa yê ke 30 serrî yo paştî danê îqtîdarê zalimî yê Başûrê Kurdîstanî û vera zextê serê şarî bêveng ê, paştî danê sîyasetê barkerdişî. Yewîya Ewropa na mesele de sûcdar a. Amerîka û Ewropa heta ke paştî bidê îqtîdarê Başûrê Kurdîstanî meseleya macîran do dewam bikero. Çunke şar nêwezano pîya bi îqtîdarê zordarî biciwîyo. Belarus zî keno ke rewşa kurdan  vera Ewropa bişuxulno û tira feyde bikero. Macîr zî daristananê sînorê Belarus-Polonya de benê qurbanê nê sîyasetî.''