Buroyê Huqûqî yê Asrinî dabi zanayene ke Rayberê Şarê Kurdî Abdullah Ocalanî êlula 2022yî de zîyaretê Îmraliyî de pêvînayîşê bi CPTyî red kerdo. Koordînasyonê KJKyî derheqê babete de eşkerayîyêke daye. Eşkerayîye wina ya:

''Buroyê Huqûqî yê Asrinî 29ê teşrîna peyêne de bi eşkerayîyêke pare kerd ke mabênê heyetê CPTyî û Rayber Apoyî de pêvînayîşêk nêameyo kerdene. Rixmo ke CPT xo sey dezgehêkê xoserî pênase keno dima ke şi Îmrali derheqê rewşa Rayberê ma û embazanê ci de eşkerayîyêke nêdaye. Rixmê ney zî agahîya ke vana Rayber Apo de pêvînayîş nêameyo kerdene rewşe giranêr kena.

Na rewşe îsbat kena ke CPT û dezgehê mîyanneteweyî yê eleqedarî tecrîdê giranî û esîrkerdişî tesdîq kenê û benê hemkarê ci. CPTyî zî xo dayo destê menfaetanê AKP-MHPyî yê faşîstî û krîterê demokrasî û huqûqî nêardî ca. Na  hemkarîya sûcî, kerdîşê vera merdimatîye û bêhuqûqî qetî nênê qebulkerdene. Rayber Apo rayberîya Modernîteya Demokratîke keno. Coka no tewirê vera ey nêno qebulkerdene. Ne kurdî ne zî cinîyê ke seba azadîye têkoşîn kenê ne zî merdimê wayîexlaq û wayîrwijdanî ney qebul kenê.

Ganî CPT cade eşkera bikero ke Îmrali de çi qewimîyeno. Çira Rayber Apo de pêvînayîş nêkerdo, raştîye de se beno, rewşa pêroyî senîn a. Ganî nê cade bêrê zelalkerdene. CPT ganî na babete de wezîfeyê xo bikero. CPT û dezgehê mîyanneteweyî ganî bikerê ke Rayber Apo avûkatanê xo bivîno, seba ney tedaya dewleta tirke bikerê.

Sîstemê Îmraliyî hînî rijîyayo, bin kewto. Êyê ke nê sîstemî vera merdimatîye awan kerdo 25 serrî yo nêeşkenê îradeyê Rayber Apoyî, têgêrayîşê azadîye û têkoşînê azadîye yê cinîyan bişiknê. Rayberê ma, gerîlayê ma, şarê ma cinîyî têkoşînî pîl kenê. Rayber Apoyî Îmrali kerdo zemînê ney ke tede erjê Modernîteya Demokratîke awan kerdê. Xoverdayîşê Îmraliyî nê erjan pîlêr keno, mende keno û pêro dinya rê vila keno. Kerdişê tewr barbar û bêrehmî nêeşkayî verê ney bigêrê û do nêeşkê.

No sîstemê Îmraliyî hînî verê çinbîyayîşî de yo. Hem bi şuxilnayîşê rayîranê huqûqî, hem bi vejîyayîşê şaran û şuxilnayîşê heqanê demokratîkan ganî ma peynîya nê sîstemî bîyarê. Ma venga şarê xo, cinîyê ke seba azadîye têkoşîn kenê, dostanê xo û pêro terefgîranê demokrasî û azadîye danê ke seba ke ma cade Rayber Apoyî ra xebere bigêrê û o bieşko avûkatanê xo bivîno çalakîyan pîl bikerê, vengê xo berz bikerê û sîstemê Îmraliyî parçe parçe bikerê.''