Çarçewa tehqîqatê Serdozgerîya Komare ya Amedî de, 8ê hezîrana 2022yî de polîsan sereştişê keyeyan de 20ê ci rojnamegerî 22 kesî destbend kerdbî. Rojnamegerî 8 rojan ra dima 16ê hezîrane de sewqê edlîye ameybî kerdene. 16 rojnamegerî Mudira Jinnewsî Safîye Alagaş, Hemserekê DFGyî Serdar Altan, Edîtorê MA Azîz Oruç, Mudirê Karanê Nuşteyî yê Xwebûnî Mehmet Alî Ertaş û Zeynel Abîdîn Bulut, Omer Çelîk, Mazlum Dogan Guler, Îbrahîm Koyuncu, Neşe Toprak, Elîf Ungur, Abdurrahman Oncu, Suat Dogûhan, Remziye Temel, Ramazan Gecîken, Lezgîn Akdenîz û Mehmet Şahîn bi îdîaya ''endamîya rêxistine'' tepişîyabî.

Roniştişo diyîn ê dewaya vera rojnamegeran Mehkemeya Cezaya Girane ya Amedî de ame kerdene.

Avûkatê Komeleya Heqanê Merdiman (ÎHD), OHDyî zî tede xeylêk avûkatî tewrê roniştişî bîyî.

Roniştiş de rojnamegeran yewver pawitişê xo da. Rojnamegeran pawitişê xo de pare kerd ke ê semedê xeberanê xo, bi îdîayanê 'şahîdanê nimiteyan' yenê muhakemekerdene. Rojnamegeran da zanayene ke ê sûcdarîya 'endamîya rêxistine' qebul nêkenê û teyna rojnamegerîye kenê. Rojnamegeran pare kerd ke îdîaname de xeberê ke înan kerdê sey sûcî ameyê hesibnayene û derheqê sûcdarîyan de delîlî çin ê.

Rojnamegeranê kurdan ê tepişteyan mehkeme de ard ziwan ke ê do hesab nêdê la hesab bipersê û vat: ''Ma do pawitişê karanê xo rê dewam bikerê.''

Pawitişê rojnamegeran ra dima şahîdanê nimiteyan û akerdeyan qisey kerd. Şahîdê akerdeyî Mehmet Çelîkî îfade kerd ke ey nêdîyo ke nê rojnamegeran sûcêk kerdo. Şahîdê nimiteyî îdîa kerd ke rojnamegerî karanê rêxistinîye kenê. 

Şahîda akerde Kezbane Kuday zî îdîayî red kerdî û vat ke produksîyonê PELî karê montaj û bernameyan keno.

Avûkatan îdîayî red kerdî û beratê rojnamegeran waşt. Hetê bînî ra dozgerî zî waşt ke wa rojnamegerî tepişte bimanê.

Pawitişan ra dima mehkeme derheqê pêro rojnamegeran de bira veradîyayîşî daye.

Serdar Altan, Azîz Oruç, Mehmet Alî Ertaş, Zeynel Abîdîn Bulut, Omer Çelîk, Mazlûm Dogan Guler, Îbrahîm Koyuncu, Neşe Toprak, Elîfe Ungur, Abdurrahman Oncu, Suat doguhan, Remzîye Temel, Ramazan Geîken, Lezgîn Akdenîz û Mehmet Şahîn bi şertê 'kontrolê edlîyî' vera dîyayî.