Pêro hêzê kurdîstanî ganî hetê Rojawanî de cabigêrê

Partî û rêxistinê kurdîstanijî vengdayîşê Temsîlkarîya Ewropa ya Îdareyê Xoserî û KNKyî ser o ameyî yewca û înan venga pêro hêzanê kurdîstanijan da ke hetê Rojawanî de cabigêrê.

ROJAWANÎ RÊ DESTEK

Paytextê Belçîka Bruksel de partî û rêxistinê kurdîstanijî vengdayîşê Temsîlkarîya Ewropa ya Îdareyê Xoserî û KNKyî ser o ameyî yewca. Kombîyayîş de rewşa Rojawanî û hêrişê dewleta tirke ya îşxalkere ameyî ercnayene. 

Hemsereka Komîteya Têkilîyanê Teberî ya Îdareyê Xoserî Îlhame Ehmed zî tewra kombîyayîşî bîye.

Îlhame kombîyayîş de pare kerd ke seba ke wayîrê destkewteyanê xo vejîyê ganî kurdî nê prosesî de bi xurtî cabigêrê. Îlhame bale ante ser ke dewleta tirke wazena kurdan qetil bikera. Îhame îfade kerd ke ê pêro dîyalogan rê amade yê û armancê înan awankerdişê Sûrîyeyêka demokratîke yo. 

Kombîyayîş de netîcename ame eşkerakerdene.

Netîcename de wina ame vatene:

''-Pawitişê Rojawanî pawitişê pêro Kurdîstanî yo. Coka wa pêro hêzê kurdîstanijî destek bidê Rojawanê.

-Herêmê Îdareyê Xoserî binê kontrolê dewleta tirke û cerganê ci de yê. Coka ganî nê herêmî bi sîstemê xo bêrê pawitene.

-Derheqê hêrişanê dewleta tirke de wa mehkemeyanê mîyanneteweyîyan rê muracat bêro kerdene.

-Amadekerdişê Qanûnê Bingeyî yê neweyî de ganî pêro kurdê Rojawanî bi yewîya xo cabigêrê.

-Koalîsyono Mîyanneteweyî, Neteweyê Yewbîyayeyî û pêro hêzê mîyanneteweyîyî wa hêrişanê dewleta tirke vindarnê, Îdareyê xoserî bipawê û hetkarîya ci bikerê.

-Wa pêro kurdî, dostê înan û merdimatîye paştî bidê koçberan û mexdûranê şerê Sûrîye..

-Şer ver bi Kurdîstanî yeno. Coka yewîya neteweyîye zaf girîng a. Wa pêro hêz, partî, rêxistin û dezgehê kurdîstanihî Konferansê Neteweyîyî bikerê û yewîya xo bi xurtî awan bikerê.''