Dewleta tirke xoverdayîşê xoîdarekerdişî de qedexeyê vejîyayîşê teberî îlan kerdibi û qezaya Nisêbînî ya  Mêrdînî rijna bi. Sucanê giranan ê dewlete ra dima wezîfedarê dewlete bêceza ameyî veradayene la mexdûran rê dewayî amebî akerdene.26ê gulana 2016î de 17ê înan doman derheqê 70 kesan de dewa ameyebî akerdene, roniştişê na dewa hema zî dewam kenê.

Na roja Îneyî roniştişê dadîya 5 domanan Nurşene Demîr a ke wextê qedexeyan de keyeyê xo canêverdabi û bêtepiştişî ameyêne hukmkerdene, ame dîyene. Demîre beşdara mehkeme nêbîye û pawitişê xo yo verên pêşkêşê mehkeme da. Derheqê Demîre de bi îdîayanê ''endamîya rêxistine'', ''bi zanayîşî kiştiş'', ''bi zanayîşî teşebusê kiştişî'', ''zerardayîşê malê umûmîye'', ''madeyanê bitehlûkeyan kiriştiş û bêdestûr peydakerdiş'' cezaya zîndanî ameye waştene.

Avûkate Gulbîne Şahîn sucdarkerişî red kerdî û îfade kerd ke seba ke muwekîla ci wextê qedexeyî de keyeyê xo ca nêverda nêna sucdarkerdene û ganî bêra veradayene. La heyetê mehkeme seba ke Demîre wextê qedexeyî de qeza de bîye û tay îfadeyê ke vatêne ''Demîre nan pawitêne, pakî û pansûman kerdêne'' sey esas girewtî. Nê semedan ra Demîre rê bi îdîaya ''endamîya rêxistine'' cezaya zîndanî ya 8 serran ameye dayene. Heman mehkeme derheqê îdîayanê ''bi zanayîşî kiştişî'', ''bi zanayîşî teşebusê kiştişî'', ''zerardayîşê malê umûmîye'' û ''kiriştişê madeyanê bitehlûkeyan û bêdestûr peydakerdişê înan'' de seba ke delîlêk çinbi bira veradayîşî daye.

Dewaya Nisêbînî de bi Nurşene Demîr hûmara tepişteyanê ke ceza girewte bîye 36.