Dadîya tepişteyê grevê vêşanîye: Rayîr nêdê nê zulmî

Botan Tîmur Wan de tepişteyanê bînan reyde grevê vêşanîye keno. Dadîya ci Zubeyde Tîmur vat: ''Ma nêtersenê û ma do heqdarîya xo ra tawîz nêdanê. Ez venga pêro dadîyan dana ke paştî bidê ma.''

Zîndanê Wanî de 14ê êlule ra nata tepişteyê sîyasîyî grevê vêşanîye yê bidorî kenê. Tepişteyî wazenê ke peynîya kerdişanê Rewşa Îstîsnayîye bêra ardene.

Tepişteyan ra yew zî Botan Tîmur o. Dadîya Tîmurî Zubeyde Tîmur vat: ''Zîndan de tepişteyî maruzê kerdişanê bêexlaqan manenê. Domanê ma vera nê kerdişan nika grevê vêşanîye de yê. Ma do nê zulmî qebul nêkerê. Ma nêtersenê û ma do heqdarîya xo ra tawîz nêdanê. Ez venga pêro dadîyan dana ke paştî bidê ma. Ya cade cewab bêro dayene waştişanê domananê ma yan zî ma do dest pê grevî bikerê. Ma sey kurdan seba ke heqanê xo wazenê no zulm ma rê yeno kerdene. Seba ke kurdî bikişîyê bahaneyî virazîyenê. La ma do vera polîtîkayanê zulmî sereyê xo nêarê war.''