Dêrsim, Çewlîg, Bedlîs û Şirnex de şewatê daristanan beno pîlêr. Destûr nêdîyeno ke şewatî bêrê hewnakerdene.

Dêrsim

Dêrsim de 3 herêmanê cîyayan de şewat esto. Xozat de şewato ke 17ê tebaxe de operasyonê leşkerî de vejîya vilayê Pulurî bi. Roja verêne Şaredarîya Dêrsimî, dezgehê sivîlî û hemwelatîyî şîyî warê şewatî la ameyî astengkerdene. 13 rojan ra dima şewatî rê mudaxele ame kerdene. Şewat roja 15. de hema zî dewam keno.

29ê tebaxe de Çirrê Firtina Velî yê Gelîya Munzurî de û Çemê Roje yê Gelîya Pilemurîye de şewat vejîya. Şar û tîmê îtfaîya yê Şaredarîya Dêrsimî xîret kenê ke şewatî hewna bikerê. La şewat vera vila beno. Gelîya Pilemurîye de gulevarnayîşê leşkeran ra dima şewat vejîyabi.

Çewlig

Qezaya Xorxolî ya Çewlîgî de 29ê tebaxe de deweka Xarsakî ya dewa Conagî de şewat vejîya. Şar pê îmkananê xo xîret keno ke şewat hewna bikero. Şewat hema zî dewam keno.

Bedlîs

Vizêr saete 10:00 de herêma Awa Weqfe de şewat vejîya. Xebatkarêkê Mudirîya Herême ya Daristanî da zanayene ke xîretê şarî qîm nêkeno û ganî şewat hewa ra bêro hewnakerdene.

Şirnex

Şirnex de warê Qurta Xanê ua Besta de 29ê tebaxe de şewat vejîya û destûr nêdîyeno ke şewat bêro hewnakerdene. Şewat herêma Girêbestkî de zî dewam keno. Warê daristanan ê dewa Mêhrînî yê herêma Besta de zî 5 rojî yo şewat esto ke netîceya bombardumanî de qewimîya.