Binpaykerdişê heqanê tepişteyan vera zêdîyenê. Binê nameyê proseduran de tepişteyan û keyeyan rê îşkenceyo psîkolojîk yeno kerdene. Tepişteyî erşawîyenê zîndananê dûran û bi nê hawayî yeno waştene ke têkilîya înan bi keyeyan bêra astengkerdene.

Dewa Deşte ya Dêrsimî de Dayîke Zere (70) îfade kerd ke lajê ci 29 serrî yo zîndan de yo û 2 serran ra nata a nêeşkaye şora lajê xo bivîna ke Zîndanê Kandira de tepişîyeno. Dayîke Zere derheqê babete de PÎRHA rê qisey kerd.

Dayîke Zere da zanayene ke dewleta tirke serra 1994î de ê dewa Rengoyî ya qezaya Depe ya Xarpêtî ra vetî coka dewa Deşte de ca bîyî. Dayîke Zere ard ziwan ke a tim zorî û zehmetîye dîye û vat:

''Depe de dewa ma ameye vêşnayene, ma zî ameyî tîya. Ma bi zorî ciwîyenê. Lajê mi 1992 de tepişîya û cezaya muebede dîyaye ci. Mi zaf bêrîya ci kerde. 29 serrî yo her rey lajê mi erşawenê zîndanêkê bînî û semedê nasnameyê ci yê sîyasî ra ci rê îşkence kenê.

Lajê mi nika Zîndanê Kandira de yo, hewte de reyêke mi rê telefon keno la qala şertanê zîndanî mi rê nêkeno. Semedê rewşa xo ya ekonomîke ra 2 serrî yo ez nêeşkena şora lajê xo bivîna. Ez têna wazena lajê xo reyêke bivîna, mi zaf bêrîya ci kerde.''