Endamê Konseya Rayberdişî yê KCK’yî Mûstafa Karasû vat ke qerardarîya xoverdayoxanê grevanê vêşanîye û rojê mergî û zextê rayapêroyîye îqtîdarê AKP-MHP’yî halêkê zorî de verdaya û saya xoverdayîşî tecrîd ameyo mehkûmkerdene. Karasûyî vat tu hêz nêeşkeno mucadeleyê azadîya şarê Kurdî vindarno û vat, “Na fedakarîye hendî rehanê Kurdan de esta. Rastîya Kurdan dinya rê amî hesnayene.”

Endamê Konseya Rayberdişî yê KCK’yî Mûstafa Karasû vizêr şan de tewrê programê Ulkeden ê Medya Haber TV’yî bi û persî cewab kerdî.

Karasûyî nê vatî:

“8 serran ra dima çira pêvînayîşî ameyî kerdene eşkera yo. Hemverê ver bi mergî şîyayîşî yê hende merdiman de bêveng mendiş, seba her îqtîdarî yeno manaya vînîkerdişêkê îtîbarî yê pîlî. Netîceyê xoverdayîşî de 8 serran ra dima sere de 2’ê Gulane de û dima ra zî 22’ê Gulane de pêvînayîş ame kerdene. No qewimîyayîşêko muhîm o. Eke înan 8 serran ra dima verda pêvînayîş bêro kerdene nê de tesîrêkê xoverdayîşî, çalakgeran û rayapêroyîye yo pîl esto. Tena no pêvînayîş nê, qaso ke medya de vejîya CPT’yî zî Rayber Apoyî dir pêvînayîş kerdo. Ameyîşê CPT’yî seba pêvînayîşî saya zextanê şarê ma yê Ewropa û xoverdayoxan de bi.

Ma Leyla Guven a ke virazîyayîşê nê pêvînayîşî de rol kay kerd bi hurmet silam kenê. ancî ma hemrayanê xo yê ke zîndanan de no xoverdayîş kerd xurt silam kenê. Tewir û xoverdayîşê Nasir Yagizî, çalakgeranê Başûrî, 14 hemrayê ma yê ke Ewropa de bî, Mele Mûstafa Tûzakî, Îmam Şîşî, Şîyar Xelîlî û xeylî hemrayanê ma yê bînan û xusûsen zî yê mayan ê Kurdan ê mexmelsipîyan no hal vet werte. Naye ra ma kesê ke xover dayê bi hurmet silam kenê, bi nameyê Têgêrayîşê xo înan rê minetdar ê. Nê fedakarîyî, nê kedî, nê şehadetî; hemra Zulkuf, hemraye Medya, hemraye Zehra, hemraye Aytene, heme fedakarîyê nê hemrayan proses ard na nuqta. Ma şehîdanê xo bi minet û hurmet bi vîr anê. Ê do nêrê xovîrrakerdene.

Çi gama ke Rayber Apoyî dir pêvînayîşî bêrê kerdene, Rayber Apo fikrê xo yê demokratîkbîyayîşê Tirkîya, bi rayîranê demokratîkan halkerdişê problemê Kurdan, seba çareserîye ceribnayîşê rayîrê sîyasetî, pêameyîşê cimatkîyî û muzakereyanê demokratîkan ano ziwan. Bi nê pêvînayîşan ancî ame dîyene ke Rayber Apo seba Tirkîya wayîrê manayêka senên o, xusûsen zî seba çareserîya problemê Kurdan ke problemo tewr bingeyên ê Tirkîya yo çende cayêkê muhîmî de yo. Heme şaranê Tirkîya no dî. Bi serran o hemverê Têgêrayîşê ma û Rayber Apoyî de nezerê şaranê Tirkîya de îmajêko negatîf yeno afernayene. Nizdbîyayîşê Rayber Apoyî nê îdrakanê negatîfan rê zî bîyo cewab.

Yewna meseleyo ke Rayber Apo ser o xeylî hesas o Rojawan û Sûrîye yo. Rayper Apo ûca 20 serrî ciwîya. Hema hema heme keyeyê Kurdî nas kerdî. Rojawan ra bi hezaran ciwan tewrê şerî bi. Mabênê Rayber Apoyî û şarê Rojawanî de gireyêko xorîn esto. Hewna zî şopê xurtî yê Rayber Apoyî Rojawan û Sûrîye ser o estê. Sûrîye, cimatê ci, dewleta ci, hêzanê ûcayî yê sîyasîyan rind şinaseno. Naye ra wazeno ke problemî mîyanê sînoran û yewîya Sûrîye de bi hemkarîye bêrê çareserkerdene û garantîyê qanûnîyî bêrê dayene.

Derheqê têkilîya nê pêvînayîşan û weçînitişê Stenbolî de zî ma eşkenê nê vajê. Rayber Apo nê pêvînayîşan de qe qalê weçînitişê Stenbolî nêkeno. Avûkatî zî nê teyit kenê. Rayber Apo esas de demokratîkbîyayîşê Tirkîya ser o vindeno. Têkilîya nê pêvînayîşî bi weçînitişî çina û rast nêyo ke kes înan yewbînan dir girê bido. Tewirê HDP’yî yê 31’ê Adare werte de yo. Heta Tirkîya de qewimîyayîşê zaf pîlî nêvirazîyê do tewirê xo zî nêvurno. Xora wina aseno ke nêvurnenê zî. Naye ra kesê ke têkilî mabênê nê pêvînayîşan û weçînitişî de ronanê spekulasyon kenê. Tayê dormeyî nê spekulasyonan kenê la nê dir têkilîya ci çina. 

Tîfaqê AKP-MHP’yî bi serran o vano ke ez do bieciqnî, biqedînî. Seba naye tim operasyonanê leşkerîyan virazeno. Hemverê nê de zî xoverdayîşêko pîl esto. Rayberîye nê vana; se serre zî dewam bikero do problemê Kurdan çareser bibo, pêkerdiş virazîyo. Eke nêro do yewna se serre dewam bikero. Şaro Kurd do teslîm nêbo. Netîceyê nê xoverdayîşan, zîndan de rakewtişan û dejan de şaro Kurd do bibo azad. Tu hêz nêeşkeno vernîya nê bigêro. Gerîla, şarê ma, hemrayê ma yê ke zîndanan de yê û heme Kurdê ke dinya de yê nê ramojnenê. Gerîla zî paştîya xo dano hêzêkê winayênî û şer keno.

Gerîla xo seperneno binge, tarîx û kulturê xoverdayîşî yê bihêzî û xover dano, çalakîyanê pîlan virazeno. Nê bingeyî de ez gerîlayan zî bi hurmet silam kena, înan pîroz kena. Înan senî şopa Mahsûn Korkmaz û 50 hezarî ra vêşêr şehîdanê ma de mucadeleyî heta ewro domna; ewro zî bi qehremanîye û bi xoverdayîşêkê pîlî heta netîce bigêrê do nê mucadeleyî bidomnê.