Denîz Firate ( Methîye Yildiztane) ya ke hêrişê DAÎŞ’î yê 8’ê Tebax a 2014’î yê Kampa Mexmûrî de cuya xo vînî kerde,  qezaya  Ebaxe ya Wanî de gorê xo ser ameye vîrardene.

Vîrardişo ke bi rêzgirewtişî ame destpêkerdene merdim û embazê Firate yê rojnamegerî tewrê ci bîyî. Platformê Rojnamegeran ê Cinîyan ê Mezopotamya ra Hîkmet Tûnçe vîrardiş de qisey kerd. Tûnçe vist vîrî ke Denîz Firate vengê cinîyan ê ke hedefê hêrişê DAÎŞ’î de yê dinya rê da eşnawitene û va: ‘’Denîze cayanê pêkewtişanê tewr giranan de bi kameraya xo vernî de cayê xo girewte. Firate  mîrasê çapemenîya azade Mûsa Anter û Gurbetlî Ersozî girewt. Ma zî kameraya aye genê û mucadeleyê ci danê domnayene. Ma do cinîyan bi nasnameyê mexdûrî nê bi serkewtişê ci nuştiş rê dewam bikerê.’’ Birayê Firate Seyat Yildiztanî zî vat embazanê Denîze çirey pênusê aye erd nêverda do meverdê zî.