Roşanê Kedkaran 1ê Gulane Dêrsim de Meydanê Seyîd Rizayî de ame bimbarekerdene.

Parlamenterê HDPyî yê Dêrsimî Alîncan Onlu, şaredarê Dêrsimî Fatîh Mehmet Maçoglu û hemşaredarê Pêrî Orhan Çelebî yo ke wezîfe ra ame girewtene û xeylêk tesmîlkarê sendîka, partîyanê sîyasîya û dezgehan tewrê aktîvîteye bîyî. Aktîvîteya ke sloganê vera humatî bîyî berzî  û 1ê Gulane ame silamkerdene de semedê kedkeranê ke cuya xo vînî kerde rêz ame girewtene.

Eşkerayîye de janê Korona ame virardene û ame waştene ke heme karkerî wa bidestmiz mabên bidê karê xo û wa dewlete berpirsîyarîya xo bîyaro ca ke şar nê rojanê janî de tengayî meanco. Reyna bale ameye antene ke nê prosesê keye de mendişî de şîdetê vera cinîyan zêdîyayo û ame vatene ke ganî kar û ameyeyê cinîyan bigêrîyo binê garantî.  Semedê vindarayîşê şîdetî zî ganî tedbîrî bêrê girewtene. Eşkerayîye de Gulîstane Doku ya bi aşmano Dêrsim de vînîbîyaye ya zî ardîyaye vîrî û ame waştene ke semedê vînayîşê Doku zafêr xîret bêro kerdene. Kedkeran vat ma do bi kede û zanistî sîtemêkê komolkî yo neweyî awan bikerê.

Aktîvîte de  êyê ke Qirkerdişê Garî yê Anqara de ameyî kiştene zî ameyî yadkerdene û goranê înan ser o vilikî ameyî ronayene.

Hetê bînî ra rêxistina HDPyî ya Dêrsimî zî banê xo yê bajarî de eşkerayîyke daye. Eşkerayîye de ame vatene ke rîyê Korona ra pêroyê dinya de krîzê kapitalîzmî xorî bîyo û pîya bi naye tekoşînê bindestan tujêr bîyo. Hemserekanê HDPyî ya Dêrsimî Nurşate Yeşîl û Îbrahîm Kasunî vat ma bindestî do bi paştdayîşê yewbînan qederê xo tayîn bikerê û ser bikewê.

Karkeranê Vilakerdişê Elektrîkê Fratî zî verê kargehê xo de bi merşê 1ê Gulane û sloganan roja xo bimbarek kerde.

Pulur de zî bi def û zûrna 1ê Gulane ame bimbarekkerdene.