Çarçewaya qerarê Heyetê Weçînitişî yê Berzî (YSK), ke vatibi kesê ke bi Qerarnameyê bi Hukmê Qanûnî de wezîfe ra erzîyayê gama ke bêrê weçînitene mazbata nêdîyo bi înan, mazbatayê 4 endamanê Meclîsê Şaredarîye û yê 2 keyayanê dewan ê Dêrsimî yê ke weçînitişê 31’ê Adare ameybî weçînitene ameyî betalkerdene.

Kesê ke mazabataya înan ameyê betalkerdene endamê Meclîsê Şaredarîye Hidir Demîr, Metîn Kiliç, Ozcan Ateş û Candan Bademe û keyayê dewa Meşeyolû ya merkezî Hakki Sûvan û keyayê dewa Gozeler a qezaya Wacixe Tûrgay Bîlge yê.

Dimayê nê qerarê YSK’yî ra hetê Walîtîye ra YSK’yî ra derheqê nê kesan de hayîdarî amîbî waştene. YSK’yo ke muracatî rê cewab dabi, bi nûşteyo ke îmzaya serekê YSK’yî Sadî Guvenî tede estbî dabi zanayene ke derheqê endamanê meclîsî de û 2 keyayan de qerarê betalkerdişê mazbatayan ameyo dîyene. Dimayê kirarîyan ra YSK’yî qeraro ke girewtibi bi Heyetê Weçînitişî yê Qeza yê Merkezî da zanayene. Candan Badema ke gama sereka Beşê Tarîxî yê Unîversîteya Munzurî bîye bi qerarê KHK’yî wezîfe ra amîbî girewtene zî qeraro ke gîrîyayo hesabê xo yê medyaya sosyale ra pare kerd. Bademe vat, “Tayê verî goreyê xebera ke mi @avbarisyildirim’î ra girewte, Heyetê Weçînitişî yê Berzî ez zî tede mazbataya çar kesanê ke endamê meclîsê şaredarîye yê betal kerda. Yewna nîşanê ravêrtişê bi rejîmê şerîatî yo ke qanûn û qerarê xo zî nas nêkeno.”