Zanîngehê Munzurî yê Dêrsimî de wendekaran zereyê kampusî de bi wesîleya 8ê Adare Roja Cinîyan ê Kedkaran a Dinya çalakîye kerde û eşkerayîya çapemenîye kerde. Xeylêk wendekarî tewrê eşkerayîye bîyî û înan sloganê ''Cinîye, Cuye, Azadîye'' vat.

Nameyê wendekaran ser o Sehere Alkin eşkerayîye kerde û vat: ''Dêrsim de cuya bi tacîz, tecawuz û şîdetî dayîyena ciwîyayene. Dêrsim de zaf serebûtê winasênî estê. Ma sey cinîyan zî her ca de têkoşîn kenê û nê têkoşînî dewam bikerê. Ma rîxmê pêro teda û zorbazîyan zî bipersê û vajê ke 'Gulîstane Doku kotî de ya?'

Alkine vist vîrî ke serekê Daîreyê Zanakirarîye Cem Tekînogluyo ke vera wendekaranê cinîyan tacîz û gefî keno hema karî sero û vat:'' Akademîsyenê îstîsmarkerî ganî cade wezîfe ra bêrê dûrvistene.''

Pêrtag û Xozatî de tay domanî maruzê îstîsmarê cînsî bibî. Alkine no serebût vist vîrî û vat: ''Ma do bikerê ke bibê vengê domanan. Ma 8ê Adare yê pêro cinîyan ê kedkaran û xebatkaran fîraz kenê. Ma tim estbî û ma do tim estbê. Ma do kargehan de, kuçeyan de axpînan de, keye de, dibistanan de girse bi girse vila bibê.''

Eşkerayîye ra dima bi zilgitan û deyîran govend ame girewtene.