Goreyê doneya Dêrsim de 491 hezar û 571 davarî est ê û şaristan de davarî zafêr hetê koçeranê bi nameyê şavaran ra yenê  resnayene. Şavakî hîna zaf wareyanê Çemişgezek, Xozat û Pêrtagî de heywananê xo çêrnenê û zimistanan zî agêrenê qezayanê xo. Krîzê ekonomîkî ra şavakî nêeşkenê miqatê heywananê xo bikerê. 

 Serekê Kooperatîfê Şit û Berhemanê Şitî yê Dêrsimî û Endamê Yewîya Wayîranê Mêşna û Bizan Ceng Akgonulî da zanayene ke Dêrsim de hezarêk û 300 keyeyî pê heywankarîye debara xo kenê la vaybîyayîşê berhemanê şitî ra şavakî hînî nêeşkenê berhemanê xo biroşê. Akgonulî pare kerd ke bi rayîrê kooperatîfê xo ê wazenê citkaran rê hetkarîya simêr, mazot, xizmetê esasî bikerê. 

Akgonulî pê hesna ke ê do seba şavakan Nêweşxaneyê Heywanan virazê û bi nê hawayî meseleyanê şavakan zî çareser bikerê. Akgonulî îfade kerd ke ê sey kooperatîfî Dêrsim de seba heywanan kanalanê awe, çirikan virazê û bê KDVyî zî simêr bihêrînê. 

Akgonulî bale ante ser ke şavakî kîloyêkê pendîrî 38 lîra ra roşenê wayîrê dikanan la dikanan de heman pendîr 150 lîra ra yeno rotene. Akgonulî vat: ''Eke şar raşta raşte berardoxan ra pendîrê xo bigêro eşkeno 60 lîra ra bigêro.  Berardoxî nêeşkenê karî bikerê. Coka wayîrê davaran wazenê heywananê xo biroşê. Eke 600-700 mêşnayê yewî est bê 300ê ci birîyenê. Çunke pereyê simêrî zaf o, heywankarî nêeşkenê simêrî bihêrînê û bidê heywananê xo.''

Akgonulî dîyar kerd ke seba ke pendîrê şavakan heqê xo nêvejeno înan kooperatîf nayo ro û nika zî do nêweşxaneyê heywanan awan bikerê ke heywanê şavakan bêrê tedawîkerdene.