Germbîyayîşê hewayî reyde koçerî zî seba ke heywananê xo bêrê cayanê hokinan dest bi şîyayîşê wareyan kerd. Bi taybetî qezayê Pulur Pîlemûrî yê Dêrsimî wayîrê wareyan ê tewr honik û biçerêyan ê. Hewteyê peyênî de nêzdîye 300 keyeyan kaşanê Koyê Helî yê Pîlemûrî de konê xo akerdî. Bi taybetî Şavaklijê ke qezayanê Pêrtag û Çemûşgezekî de ciwîyenê, vernîya heme koçeran şîyî wareyan.

Roje saete 5 de dest pêkena

Koçerê ke kaşanê tewr berzan ê  koyanê Dêrsimî de konê xo akerdê, çiqas vajê cuya înan hende bizor û zehmet a. Şiwanî şewe û roje leyê heywananê xo ra dûrî nêkewenê, înan danê çerênayene û pawenê. Seba koçeran roje saete 5 de dest pêkena.

Mast û penîr virazenê

Cinîya 59 serre Sultan Çikar a ke nêzdîyê 600 pesê aye estê, da zanayene ke ê destê şefeqî de heşar benê, ewil penîrê xo benê mandira, bado karanê rojane yê sey nan, kincşutiş û pakkerdişî kenê û ver bi şanî reyna şinê pesanê xo doşenê. Çinare, roje de di reyî pesan doşena û şitê pesan kena mast û penîr.

Beno ke karê ma giran o, la hende zî rindek o

Çinare ard ziwan ke seba ke ê kar û baran kenê, nêzana ke roja înan senî derbaz bena û vat, “Ez karê heywanweyekerdişî ra û wareyan ra zaf hes kena. Ma 28 serrî yo ke koçerîye kenê. Qet nêbo ez erdî xo ser o karê xo kena û no karê min o. Goreyê mi her kes eşkeno goreyê şert û mercanê xo, xozayê xo de nê karî bikero. Qet nêbo karê kesêkê bînî nêkena. Beno ke karê ma giran o, la hende zî rindek o.”

Şewe û roje koyan de yo

Celal Koçyîgîto ke 65 serrî yo da zanayene ke o 15 serrîyê xo ra nata karê şiwaneyîye keno û vat, “Bi şewe û roje ez pesanê xo çerênena. Wexto ke ez heywananê kovîyan vînena zaf keyfweş bena. Şiwaneyîye zaf zor a, la serê koyan de hewayo pak merdiman sermest keno.”

Karê heywankarîye sînorê çinbîyayîşî de yo

Suleyman Koçaslano ke vejîyayo wareyan zî, nêzdîyê 400 pesê ey estê. Koçaslanî, ard ziwan ke keyeyê xo reyde bi serranê nê karî keno û vat, “Ma serê her pesê 7 û 7 nêm TL pereyan danê dewlete. Her qurişe de keda domananê ma esta. Ganî dewlete bi perayanê ke ma ra gêna, şert û mercanê koçeran weş û baş bikera.  La ma tu çîyêk nêvînenê. Eke paştdayîş nêro dayene, welat qedîyeno, girêdayîyê welatan cîyayan beno. Tirkîya de karê weyekerdişê heywankarîye sînorê çinbîyayîşî de yo. Seba ke kes paştdayîş nêdano berardoxan.”