Dêrsim de Keyeyanê Kume yê Kurê Sipî de bi serran o meseleya awe û rayîrî esta. Rixmê hende sozanê selahîyetdaranê dewlete zî mesele heta nika çareser nêbîye. Hemwelatîyê Kurê Sipî  pê bîdonan awe kirişnenê keyeyanê xo. La reyna zî xeylêk axpînî bêawe ra bîyî wişk.

Herinda çareserîya nê meseleyan de Kurê Sipî de hetê şîrketa madenî ya MAPEGî ra xebata madenî dîyaye destpêkerdene.  

Hemwelatîyan ra Haskar Kiliçî (60) da zanayene ke înan seba meseleya awe û rayîrî zaf muracatî kerdî û vat: ''Ma do destûr nêdê ke ê destê xo bidê erdê ma. Xebera ma pê madenî çinbî. Seba awe bi serran o nênê la seba madenî cade ameyî. Wa Dêrsim bibo yew, ma destûr nêdê ke xozaya ma bêra çinkerdene.'' 

Hemwelatî Hatîce Fîlîz (70) vat: ''Ma pê bîdonan awe kirişnenê. Nika zî hê vanê ke ê do koyanê ma jehrîn bikerê. Wa heywanan û xozaya ma rê wina nêkerê.''

Şeref Coşkunî (40) vat: ''Walîyê Dêrsimî vatbi ê do na mesele safî bikerê. La nika belaya madenî vejîyaye werte. Maden yeno manaya mergî. Seba ke no maden bêro vindartene ma do xîret bikerê. Pê xebata madenî ê do tîya talan bikerê. La awe nêanê dewe. Walîyî zî soz dabi la înan ra kesêkî/e zî sozê xo nêard ca.''