Dêrsim de hêzanê demokrasî û kede protestokerdişê Qirkerdişê Mereşî û hêrişê vera heykelê Seyîd Rizayî eşkerayîyêk daye. Eşkerayîye de ame vatene ke êyê ke vera zulmê zaliman hetê mazlûman de cagirewt ma xo vîr ra nêkerdî do çirey zî nêkerê.

Çalakîya ke Meydanê Seyîd Rizayî de ameye kerdene de pîranê Ocaxê Mansûrî ra Nesimi Gençlikî eşkerayîye wende. Gençlikî bale ante hêrişê vera elewîyan ser û vat: Roja ma de zî heme banê elewîyan yenê nîşankerdene û mesajê tehdîtî yenê nuştene. Heta ke zîhnîyetê Yezîtî dewam bikero huzur do nêro welat. Seba ke tarîxê merdimîye nê eybê girdî ra bêro xelisnayene ganî  înan ke qirkerdişî kerdî bi komelî bêrî têrî û xetayê xo qebul bikerî. Serekê Şaredarîya Dêrsimî Fatîh Mehmet Maçugluyî zî vera hêrişê vera Seyîd Rizayî hêrsê xo ard ziwan û vat wedartişê heykelî mumkun nîyo.